«Մենք ուզում ենք, որ միջազգային հանրությունը իմանա Ադրբեջանի արդար պայքարի մասին, և կարևոր է, որ ճիշտ տպավորություն ստեղծվի ստույգ տեղեկատվության հաշվին», - այսօր Բաքվում հայտարարել է Թուրքիայի մեջլիսի նախագահը:
Թուրքիայի և Ադրբեջանի խորհրդարանների կազմակերպած Հասարակական գիտությունների 7-րդ համաժողովի ժամանակ իր ելույթում Մուստաֆա Շենթոփը կարևորել է, որ Ղարաբաղը հասարակական գիտությունների տարբեր ճյուղերի ուսումնասիրությունների նյութ դառնա:
«Կարծում ենք, որ այս համաժողովը կարևոր է միջազգային հանրության ուշադրությունը Ղարաբաղի վրա հրավիրելու համար», - ասել է նա:
Մուստաֆա Շենթոփը, հիշելով իր վերջին այցը Շուշի և Ֆիզուլի, հայերին կրկին մեղադրել է պատերազմից հետո Ադրբեջանի վերահսկողության տակ անցած տարածքները հիմնովին ավերելու համար:
Մեջլիսի նախագահը նաև ընդգծել է, որ Թուրքիան շարունակելու է աջակցել եղբայրական Ադրբեջանին Կովկասում մնայուն խաղաղության հաստատման ճանապարհին:
