Մեկնարկել է ընդդիմության ավտոերթը քաղաքի մի քանի ծայրամասերից։ Երթի մասնակիցները լրագրողներին հայտնեցին, որ իրենք ավտոերթի միջոցով քաղաքացիներին իրազեկում են անհնազանդության ակցիաների մասին՝ կոչ անելով միանալ դրանց։
Ավտոերթին ուղեկցում են ոստիկանական մեքենաները, երթերը խաղաղ են։
Իշխանափոխության պահանջով ընդդիմություն արդեն երկրորդ շաբաթն է փողոցում։ Երեկվա ակցիաներն էլ , ինչպես նախորդ օրերին, առանց միջադեպերի չանցան․ ոստիկանությունը կրկին ուժ կիրառեց: Ժամը 16-ի դրությամբ ուժայինները մայրաքաղաքի փողոցներից 61 քաղաքացու էր բերման ենթարկել:
Հայաստանի խորհրդարանական ընդդիմությունը ապրիլի վերջից բողոքի ակցիաներ է իրականացնում իշխանափոխության պահանջով, մայիսի 1-ի հանրահավաքում հայտարարվեց անհնազանդության ակցիաներ սկսելու մասին։ Ընդդիմությունը պայքարը սկսել է Արցախի կարգավիճակի նշաձողը իջեցնելու վերաբերյալ վարչապետ Նիկոլ Փաշինյանի հայտարարությունից հետո։ Նրանք պնդում են՝ Փաշինյանի կառավարությունը մտադիր է Արցախը ճանաչել Ադրբեջանի կազմում։ Ընդդիմադիրները հայտարարում են, որ իշխանությունների հեռացումից հետ ձևավորվելու է ազգային համաձայնության կառավարություն՝ պնդելով՝ պետք է բացառվի Արցախի ցանկացած կարգավիճակ Ադրբեջանի կազմում, պետք է ամրապնդվի Հայաստանի և Արցախի անվտանգության համակարգը։
