Ադրբեջանի նախագահ Իլհամ Ալիևը Եվրոպական խորհրդի նախագահ Շառլ Միշելի հետ հեռախոսազրույցում ասել է, որ պատրաստ է երկկողմ բանակցություններ վարել Հայաստանի վարչապետ Նիկոլ Փաշինյանի հետ:
«Պետության ղեկավարը տեղեկացրել է, որ արդեն կազմվել են հայ-ադրբեջանական սահմանի սահմանազատման և սահմանագծման, ինչպես նաև երկու երկրների միջև խաղաղության պայմանագրի նախապատրաստման հարցերով աշխատանքային խմբերը, և հայտնել է Բաքու-Երևան ձևաչափով բանակցություններին պատրաստ լինելու մասին»,- ասվում է Ադրբեջանի ղեկավարի մամլո վարչության տարածած հաղորդագրությունում:
Ալիևը շնորհակալություն է հայտնել Միշելին հայ-ադրբեջանական հարաբերությունների բարելավման հարցին ուշադրություն հատկացնելու և սատարելու համար:
Շառլ Միշելն, իր հերթին, վստահեցրել է, որ կշարունակի ջանքեր գործադրել հանուն երկու երկրների հարաբերությունների բարելավման և Հարավային Կովկասում կայուն խաղաղության հաստատման:
Ալիևի գրասենյակը նշում է, որ հեռախոսազրույցը տեղի է ունեցել Միշելի նախաձեռնությամբ:
