«Այդ քայլերով նրանք միայն հետաձգում են մեր հողից հեռանալու պահը»
Ուկրաինայի նախագահ Վլադիմիր Զելենսկին այսօր ասել է, թե Մարիուպոլում մնացած ուկրաինական ստորաբաժանումները շարունակում են դիմադրությունը:
«Թշնամին շարունակում է հարձակումը հարավում և արևելքում և ամեն ինչ անում է, որ գոնե որևէ բան ներկայացնի իբրև հաղթանակ: Նրանք նոր գումարտակներ են բերում, փորձում են այսպես կոչված զորակոչ հայտարարել գրավյալ տարածքներում», - ասել է Զելենսկին՝ շարունակելով. - «Այդ քայլերից և ոչ մեկը մեր երկրի դեմ պատերազմում չի օգնի զավթիչներին: Այդպես նրանք միայն կհետաձգեն անխուսափելի պահը, երբ ստիպված կլինեն հեռանալ մեր հողից, այդ թվում Մարիուպոլից, որը շարունակում է դիմադրել, ինչ էլ որ ասած լինեն զավթիչները»:
Նրա այդ ուղերձը հակասում է Մոսկվայի երեկվա հայտարարությանն այն մասին, թե, Մարիուպոլը, ինչպես նախագահ Վլադիմիր Պուտինն է ձևակերպել, «ազատագրվել է»:
Ռուսները պատերազմի առաջին օրվանից՝ փետրվարի 24-ից են մարտեր մղել Մարիուպոլի համար: Ազովի ծովի ափին գտնվող այդ քաղաքն ունի ռազմավարական կարևոր նշանակություն:
Մոտ երկու ամիս տևող անդադար ռմբահարումների և հրթիռակոծոթյունների հետևանքով Մարիուպոլը գրեթե ամբողջությամբ վերածվել է ավերակների:
«Ռուսներն են խափանում խաղաղ բնակիչների տարհանումը»
Մարիուպոլի քաղաքապետ Վադիմ Բոյչենկոյի փոխանցմամբ, քաղաքում դեռ մնում է մոտ 100 հազար խաղաղ բնակիչ: Նրանք սպասում են տարհանման հնարավորության, ռուսները շատ փոքր քանակով ավտոբուսներ են տրամադրում. երեկ խոստացել էին 90, բայց տրամադրեցին ընդամենը 7 ավտոբուս:
Մարիուպոլում մնացած ուկրաինացի զինծառայողները, ըստ քաղաքապետի, կտրականապես մերժում են հանձվելու առաջարկը և ասում են, թե պատրաստ են դուրս գալ թաքստոցներից միայն եթե ստանան զենքը ձեռքում հեռանալու հնարավորություն, որ անմիջապես միանան Ուկրաինայի բանակին և շարունակեն պայքարը:
Ռուսները դա, բնականաբար, չեն ընդունում և պահանջում են առանց վերապահումների հանձնվել:
Ռուսները, ըստ քաղաքապետի, մշտապես խափանում են խաղաղ բնակիչներին տարհանելու փորձերը. - «Մարտի սկզբից էվակուացիա ենք սկսել, նշել են տեղերը, որտեղից կհանենք մարդկանց, քարտեզներ են ուզել՝ տվել ենք քարտեզներ, հարցրել են, թե քանի ավտոբուս է պետք՝ ասել ենք թիվը։ Եվ հետո նրանք ռմբահարել ու ոչնչացրել են թե' այդ տարհանման տեղերը, թե՛ ավտոբուսները։ Նրանք են խափանել տարհանումը»:
Նրա խոսքով, կա մեկ անձ, որի ձեռքում է մարիուպոլցիների ճակատագիրը, և այդ անձը նախագահ Պուտինն է: Մինչդեռ, ռուսական կողմը շարունակում է գրոհները:
«Ռուսաստանի օդատիեզերական ուժերն Ուկրաինայում հարվածներ են հասցրել 58 ռազմական թիրախներին, դրանց թվում են 4 հրամանատարական կենտրոն, վառելիքի 3 պահեստ, մարդուժի կուտակման 51 վայր», - ասել է Ռուսաստանի պաշտպանության նախարարության խոսնակ, գեներալ-մայոր Իգոր Կոնաշենկովը:
Երեկ ռուսական հեռուստատեսությամբ հեռարձակվել է ռեպորտաժ նախագահ Վլադիմիր Պուտինի և պաշտպանության նախարար Սերգեյ Շոյգուի հանդիպման մասին, որի ընթացքում Շոյգուն ասել է, թե Մարիուպոլը ռուսների հսկողության տակ է, և միայն «Ազովստալի» գործարանի հսկայական համալիրի տարածքում գտնվող ուկրաինացի զինծառայողներն են շարունակում դիմադրությունը:
Պուտինը կարգադրել է չեղարկել գրոհը, բոլոր կողմերից շրջափակել համալիրը և այդպես չվտանգել ռուսաստանցի զինծառայողների կյանքը:
Ինչքա՞ն ժամանակ կդիմանան ուկրաինացիներն «Ազովստալի» տարածքում
Բրիտանացի և ամերիկացի ռազմական վերլուծաբանների համոզմամբ, ռուսները համոզվել են, որ «Ազովստալի» համալիրում թաքնված ուկրաինացիներն ունեն բավական ռազմական կարողություն ռուսներին կատաղի դիմադրություն ցույց տալու և լուրջ կորուստներ պատճառելու համար:
Հետևաբար, Կրեմլում որոշել են առայժմ չհարձակվել համալիրի վրա: Սակայն ինչքան ժամանակ կարող են այնտեղ մնալ ուկրաինացիները, ունե՞ն արդյոք զենք, զինամթերք, պարեն, ջուր, դեղամիջոցներ՝ այս պահին հայտնի չէ:
Գուցե ռուսները ենթադրում են, որ սովամահության դատապարտված ուկրաինացիներն ի վերջո կհամաձայնեն հանձնվել:
Ռուսները հավաստիացնում, են, որ հանձնվողների նկատմամբ կլինի մարդասիրական վերաբերմունք, վիրավորներն ու հիվանդները բուժօգնություն կստանան:
Միացյալ Նահանգները երեկ ևս 1 միլիարդ 300 միլիոն դոլարի օգնություն է խոստացել Կիևին: Ուկրաինային քաղաքական, տնտեսական և ռազմական աջակցություն են տրամադում նաև Եվրամիությունն ու ՆԱՏՕ-ն:
Պուտին-Զելենսկի հանդիպումը կախված է բանակցությունների արդյունքից
Այսօր ռուս-ուկրաինական պատերազմի 58-րդ օրն է: Ռուսաստանի ղեկավարն այսօր հեռախոսով զրուցել է Եվրոպական խորհրդի նախագահ Շարլ Միշելի հետ, ով չորեքշաբթի օրը Կիևում հանդիպել է Զելենսկու հետ:
Ըստ Կրեմլի, Միշելը խոսել է Պուտին-Զելենսկի հանդիպում անցկացնելու նպատակահարմարության մասին, սակայն Ռուսատանի նախագահն ասել է, թե այդ հանդիպման հնարավորությունը կախված է ռուս-ուկրաինական բանակցությունների արդյունքներից:
Ըստ Պուտինի, Կիևն առայժմ հետևողականություն չի դրսևորում և պատրաստ չէ որոնել փոխընդունելի լուծումներ:
Պուտինը նաև դժգոհություն է հայտնել, պնդելով, թե Եվրամիության ղեկավարներն իրենց գործողություններով և մեկնաբանություններով նպաստում են ռուսատյացության տարածմանը:
