Արցախը շարունակում է պայքարն իր ինքնորոշման իրավունքի իրացման համար՝ չընդհատելով անկախ պետականաշինության գործընթացը, այսօր հայտարարել է նախագահ Արայիկ Հարությունյանի Արցախի պետական համալսարանի գիտական խորհրդի անդամների հետ հանդիպմանը:
Նա նշել է, որ 44-օրյա պատերազմից հետո Արցախի անվտանգային նոր համակարգը ձևավորվում է ՌԴ խաղաղապահ զորակազմի հետ համագործակցությամբ, և խաղաղապահները ներգրավված են շփման գծում ծագող խնդիրների լուծմանը:
«Ակնկալելով նրանց թվաքանակի ավելացում՝ մենք զուգահեռաբար բարելավում ենք անվտանգության սեփական մեխանիզմները»,- շեշտել է Արայիկ Հարությունյանը:
Արցախի նախագահի աշխատակազմի հաղորդմամբ` քննարկվել են տարածաշրջանին առնչվող հիմնախնդիրները՝ վերջին աշխարհաքաղաքական իրադարձությունների համատեքստում:
Արցախի խորհրդարանականներն, իրենց հերթին, ավելի վաղ հայտարարել էին, թե ոչ մի իշխանություն իրավունք չունի Արցախի կարգավիճակի նշաձողն իջեցնելու:
Վարչապետ Նիկոլ Փաշինյանն էր այս շաբաթ խորհրդարանում ասել, որ միջազգային հանրությունը հայկական կողմից նման ակնկալիք ունի:
Արայիկ Հարությունյանը այդ օրը ՀԿ-ների հետ հանդիպմանն ասել էր, որ Արցախի իշխանությունները որևէ հանգամանքում չեն հրաժարվելու ժողովուրդների ինքնորոշման իրավունքի իրացման պայքարի ճանապարհից:
