Թուրքիայի նախագահ Ռեջեփ Թայիփ Էրդողանի ավագ խորհրդական Իբրահիմ Քալընը Դոհայում տեղի ունեցած միջազգային հավաքում ասել է, որ Թուրքիան և մյուս երկրներն Ուկրաինայի ճգնաժամը կարգավորելու համար պետք է պահպանեն երկխոսությունը Ռուսաստանի Դաշնության հետ:
«Եթե բոլորն այրեն կամուրջներն, ո՞վ ի վերջո պետք է խոսի Ռուսաստանի հետ: Ուկրաինան պետք է անհրաժեշտ օգնությունը ստանա պաշտպանվելու համար, սակայն Ռուսաստանի փաստարկները հարկ է լսել»,- ասել է Թուրքիայի նախագահի խորհրդականը:
Անկարան պատերազմից առաջ և դրա մեկնարկից հետո բազմիցս հայտարարել է, որ ցանկանում է միջնորդի դեր կատարել և պատրաստ է Ռուսաստանի և Ուկրաինայի ղեկավարների հանդիպումներ կազմակերպել: Միաժամանակ Թուրքիան նշել է, որ չի միանում Ռուսաստանի դեմ պատժամիջոցներին:
