Արտգործնախարարությունում այսօր տեղի են ունեցել հանդիպումներ Հայաստանում հավատարմագրված դիվանագիտական ներկայացուցչությունների ղեկավարների և միջազգային կառույցների ներկայացուցիչների հետ։
Օտարերկրյա դիվանագետներին է ներկայացվել Ադրբեջանի կողմից Արցախում հումանիտար ճգնաժամ առաջացնելուն ուղղված գործողությունները, այդ թվում՝ գազի մատակարարման շարունակական խաթարումը, ենթակառուցվածքների և քաղաքացիական բնակչության թիրախավորումը, Արցախի բնակչության նկատմամբ այլ հոգեբանական ճնշումների գործադրումը, նշում է ԱԳՆ-ն։
Հումանիտար ճգնաժամի կանխման համատեքստում ընդգծվել է միջազգային հանրության համաչափ և հստակ արձագանքի կարևորությունը։
Վերջին օրերին թե՛ Արցախի, թե՛ Հայաստանի սահմաններին կրկաոցներ էին։ Բաքուն, սակայն, կա՛մ հերքում կա՛մ էլ պնդում էր, թե հայկական զինված ուժերն էին խախտում հրադադարը։
Բացի այդ, Արցախում ավելանում են հումանիտար խնդիրները։ Արդեն 7-րդ օրն է` շուրջ 100 հազար բնակիչ զրկված է գազից։ Հայաստանից Արցախ մտնող միակ գազատարի խողովակը վնասվել է Ադրբեջանի վերահսկողության տակ գտնվող տարածքում։ Ռուս խաղաղապահների միջնորդությամբ բանակցություններ են ընթանում վերանորոգումը կազմակերպելու համար, սակայն անարդյունք։
