Սպիտակ տան մամուլի քարտուղար Ջեն Սաքին նախազգուշացրել է, որ Ռուսաստանը կարող է քիմիական կամ կենսաբանական զենք կիրառել Ուկրաինայում, և հերքել է պնդումները, թե Վաշինգտոնն է որևէ տեղ այդ զենքը մշակում: Չորեքշաբթի օրը Սաքիի հայտարարությունը հրապարակվել է Twitter-ում։
Ավելի վաղ Ռուսաստանի պաշտպանության նախարարությունը հայտարարել էր, թե Ուկրաինայի տարածքում Պենտագոնի հետ համատեղ ծրագրերի շրջանակում գործում են 30 կենսալաբորատորիաներ, որոնք, ըստ ՌԴ ռազմական գերատեսչության, աշխատել են վտանգավոր վարակների հարուցիչների հետ։
Սաքին ասել է, որ այս հայտարարություններն «ապատեղեկատվական օպերացիա» են։
