Մարտի 9֊ին օրվա ընթացքում, այնուհետև ամբողջ գիշեր Ադրբեջանի զինված ուժերը տարբեր տրամաչափի հրաձգային զինատեսակների, ինչպես նաև ականանետերի կիրառմամբ պարբերաբար խախտել են հրադադարը, հաղորդում է Արցախի Պաշտպանության բանակը։
Մասնավորապես, ըստ հաղորդագրության, երեկ ժամը 14֊14։30-ի սահմաններում Արցախի Մարտունու շրջանի Խնուշինակ գյուղի հարակից տարածքի ուղղությամբ արձակվել է 60 մմ տրամաչափի ականանետի 2 ական, իսկ ժամը 15։50֊ից մինչև մարտի 10֊ի ժամը 5։40 հակառակորդը 15 անգամ 60 մմ. տրամաչափի ականանետ է կիրառել արևելյան ուղղությամբ՝ Խրամորթ գյուղի հարակից տարածքի վրա արձակելով ընդհանուր առմամբ 23 հատ ական։
Հայկական կողմից տուժածներ չկան։
Հրադադարի կոպիտ խախտումների վերաբերյալ տեղեկացվել է Արցախում խաղաղապահ առաքելություն իրականացնող ՌԴ զորակազմը, նաև փոխանցում է Արցախի ՊԲ մամուլի ծառայությունը։
Ադրբեջանի պաշտպանության նախարարությունն էլ պնդում է, թե գիշերը հայկական կողմն է 28 անգամ խախտել հրադադարը Աղդամի շրջանի ուղղությամբ։
