Գերմանիայի կանցլեր Օլաֆ Շոլցն այսօր հեռախոսով զրուցել է Ռուսաստանի նախագահ Վլադիմիր Պուտինի հետ:
Գերմանիայի կառավարության խոսնակ Շտեֆեն Հեբեշտրայտի փոխանցմամբ, «կանցլերը ծայրահեղ մտահոգություն է հայտնել Ուկրաինայում ստեղծված իրավիճակի կապակցությամբ»:
«Մոտ մեկ ժամ տևած հեռախոսազրույցում կողմերը միմյանցից տարբերվող տեսակետներ են փոխանակել {Ուկրաինայում} տեղի ունեցող իրադարձությունների կապակցությամբ: Կանցլերը Ռուսաստանի ղեկավարությանը կոչ է արել անհապաղ դադարեցնել մարտական գործողությունները և ընձեռել պատերազմի մեջ գտնվող շրջաններ մարդասիրական օգնություն հասցնելու հնարավորություն»,- ասել է Հեբեշտրայտը:
Նրա փոխանցմամբ, Պուտինն, իր հերթին, կանցլերին հաղորդել է, որ Ռուսաստանը և Ուկրաինան մտադիր են այս շաբաթավերջին բանակցությունների երրորդ փուլն անցկացնել:
Ռուսական պետական լրատվամիջոցների փոխանցմամբ, Պուտինը Շոլցին խնդրել է «ազդեցություն գործել Ուկրաինայի նախագահ Վլադիմիր Զելենսկու վրա և համոզել նրան՝ հնարավորինս արագ ազատել ու տարհանել այդ Կիևում գտնվող օտարերկրացիներին»:
Պուտինը պնդել է, թե մոտ 6 հազար օտարերկրացիներ չեն կարողանում լքել Ուկրաինան և «ծայրահեղականների կողմից օգտագործվում են որպես կենդանի վահան»:
