Ամերիկյան հետախուզությունը ենթադրում է, որ ուկրաինական ուժերը կարող են չհասնել իրենց նպատակներին հունիսին սկսված հակահարձակման ժամանակ:
Ըստ այդ կանխատեսման՝ ուկրաինական զինված ուժերը չեն կարողանա հասնել Զապորոժիեի շրջանի Մելիտոպոլ քաղաքը և դրանով փակել ցամաքային կապը ռուսական ուժերի և բռնակցված Ղրիմի միջև՝ ռուսական պաշտպանական գծերի պատճառով։ Ըստ այդ տվյալների՝ ուկրաինական զորքերը, որոնք այժմ գտնվում են Մելիտոպոլից 80 կիլոմետր հեռավորության վրա, լավագույն դեպքում կանգ կառնեն քաղաքից մի քանի կիլոմետր հեռավորության վրա։
Ռազմական վերլուծաբան Ռոբ Լին, մասնավորապես, ասել է. - «Ռուսաստանն այնտեղ ունի երեք հիմնական պաշտպանական գիծ, իսկ դրանցից հետո՝ ամրացված քաղաքներ։ Հարցը միայն այն չէ, թե արդյոք Ուկրաինան կարող է ճեղքել դրանցից մեկը կամ երկուսը, այլև թե արդյոք նրանք կարող են ճեղքել բոլոր երեք գծերը և ունենալ բավարար ուժեր ավելի նշանակալի բանի հասնելու համար, օրինակ՝ Տոկմակի գրավումը»:
Ուկրաինական իշխանությունները բազմիցս ասել են, որ հակահարձակման ընթացքում դանդաղ առաջխաղացման պատճառը ոչ միայն ռուսական պաշտպանության գծերն են, այլ նաև՝ արևմտյան սպառազինության պակասը: Ուկրաինան, մասնավորապես, չի ստացել F-16 կործանիչներ, որոնց անհրաժեշտության մասին խոսում է տարվա սկզբից։
Ուկրաինական ուժերը տեսանյութեր են հրապարակել, ցույց տալով, թե անօդաչուների հարվածներով ինչպես են Լուգանսկի մարզում անտառում քողարկված ռուսական հակաօդային պաշտպանության համակարգ ոչնչացնում, իսկ Դոնեցկի մարզում, Բախմուտից ոչ հեռու հարվածում ռազմական ստորաբաժանման տեխնիկային։
Ռուսաստանի պաշտպանության նախարարության խոսնակ Իգոր Կոնաշենկովն ամենօրյա հաղորդագրությունում ասել է, որ անցած օրվա ընթացքում ուկրաինական օդուժի երկու Су-25 կործանիչ է ոչնչացվել և 26 անօդաչու թռչող սարք։ Պատերազմից ի վեր ուկրաինական բանակի ընդհանում կորուստների մասին նա մի քանի տասնյակ հազարի հասնող տարբեր տեսակի սպառազինություններ է թվարկել։
Մեծ Բրիտանիայի գլխավորած եվրոպական երկրների խումբն այսօր հայտարարեց 90 միլիոն ֆունտ ստերլինգի (շուրջ 115 միլիոն դոլար) հակաօդային պաշտպանության համակարգեր և սարքավորումներ Ուկրաինային փոխանցելու մասին:
Այս գումարը ներառում է անօդաչու թռչող սարքեր հայտնաբերելու և ոչնչացնելու համար նախատեսված Cortex Typhon անվավոր հակաօդային պաշտպանության համակարգերի մատակարարման 56 միլիոն ֆունտ ստերլինգի պայմանագիր նորվեգական Kongsberg պաշտպանական ընկերության հետ: Ավելի վաղ նույնը հայտնել էր ընկերությունը։
Ուկրաինայի համար միջազգային հիմնադրամը, որի կազմում են Մեծ Բրիտանիան, Նորվեգիան, Նիդերլանդները, Դանիան և Շվեդիան, ստորագրել է Ուկրաինայի հակաօդային պաշտպանության համակարգերին վերաբերող ևս երկու պայմանագիր, որոնց մասին կհայտարարվի ավելի ուշ։
Reuters լրատվական գործակալությունն էլ հաղորդում է, որ ԱՄՆ-ը պաշտոնապես հավանություն է տվել Դանիայից ու Նիդերլանդներից Ուկրաինա F-16 կործանիչներ ուղարկելուն։ Նշվում է, որ դա կարող է տեղի ունենալ ուկրաինացի օդաչուների՝ F-16 օդանավեր կառավարելու պատրաստություն անցնելուց հետո:
Reuters-ի թղթակիցները ծանոթացել են Դանիայի և Նիդերլանդների արտաքին գործերի նախարարներին ԱՄՆ պետքարտուղարի հղած նամակի պատճենին, որում Էնթոնի Բլինքենը վստահեցնում է, որ հաստատման հետ կապված խնդիրներ չեն լինի։
Հուլիսի 17-ից՝ Ռուսաստանի՝ Ուկրաինայի նավահանգիստներից հացահատիկի արտահանման գործարքը չերկարաձգելուց ու Սև ծովում անվտանգ միջանցքի փակվելուց հետո առաջին անգամ Օդեսայից դուրս եկած բեռնանավը հասել է Ստամբուլի նավահանգիստ։
Կոնտեյներներով բեռնված «Յոզեֆ Շուլտե» նավը Օդեսայից դուրս է եկել օգոստոսի 16-ին։ Այն 30 հազար տոննա բեռ է փոխադրում, այդ թվում՝ պարենային ապրանքներ։ Հոնկոնգի դրոշով նավարկող այդ նավը ռուս - ուկրաինական պատերազմի սկզբից ի վեր՝ 2022-ի փետրվարից, մնացել էր Օդեսայի նավահանգստում։
Այս գիշեր Ռուսաստանի հակաօդային պաշտպանությունը անօդաչու թռչող սարք է խոցել, որը թռչում էր դեպի Մոսկվա, բեկորներն ընկել են Էքսպոկենտրոնի մոտ: Նախնական տվյալներով՝ զոհեր չկան, այսօր Տելեգրամում գրել է Մոսկվայի քաղաքապետ Սերգեյ Սոբյանինը։
«Անօդաչու թռչող սարքի բեկորներն ընկել են Էքսպոկենտրոնի գոտում, շենքին էական վնաս չի հասցվել», - գրել է Սոբյանինը:
Հինգշաբթի ուշ երեկոյան էլ Բելգորոդի շրջանում է անօդաչու թռչող սարք խոցվել, հայտնել են ՌԴ պաշտպանության նախարարությունը և մարզային իշխանությունները։
Ռուս զինվորականների տվյալներով՝ զոհեր և ավերածություններ չկան։
Մոսկվայի բոլոր 4 օդանավակայանները գիշերը ժամանակավոր փակվել էին:
Բելառուսի նախագահ Ալեքսանդր Լուկաշենկոն հավաստիացրել է, որ Ռուսաստանի նախագահ Վլադիմիր Պուտինն իր վրա ճնշում չի գործադրում Ուկրաինայի դեմ պատերազմին մասնակցելու համար։
«Բելառուսի ներգրավվածությունը․․. ի՞նչ կտա դա՝ ոչինչ», - ասել է Լուկաշենկոն, որի երկիրը սահմաններ ունի Ուկրաինայի, Ռուսաստանի և ՆԱՏՕ-ի անդամ երեք երկրների հետ։
«Եթե դուք՝ ուկրաինացիներդ չհատեք մեր սահմանը, մենք երբեք չենք մասնակցի պատերազմին։ Այս թեժ պատերազմին։ Բայց մենք միշտ կօգնենք Ռուսաստանին՝ նրանք մեր դաշնակիցներն են», - ասել է Լուկաշենկոն ուկրաինացի, բայց ռուսամետ լրագրող Դիանա Պանչենկոյին տված հարցազրույցում։
Նա զգուշացրել է, որ Բելառուսը կպատասխանի արտաքին ագրեսիային, ներառյալ՝ միջուկային զենքի կիրառմամբ, որ Մոսկվան տեղյակայել է այդ երկրի տարածքում։
Լուկաշենկոն ասել է, թե կարծում է՝ Պուտինն արդեն հասել է իր նպատակներին Ուկրաինայում, և հավելել է, թե երկու կողմերը պետք է նստեն բանակցային սեղանի շուրջ և պատրաստ լինեն քննարկելու բոլոր հարցերը, ներառյալ՝ Ղրիմի և Ուկրաինայի մյուս տարածքների ապագան, որոնց նկատմամբ Ռուսաստանը հավակնություններ ունի։ Բայց, նրա խոսքով, Ռուսաստանը երբեք Ղրիմը հետ չի տա:
«Ռուսաստանի նպատակները մինչ օրս արդեն իրականացվել են։ Այս պատերազմի ավարտից հետո Ուկրաինան երբեք Ռուսաստանի հանդեպ իրեն այդքան ագրեսիվ չի պահի, ինչպես պատերազմից առաջ», - ասել է Լուկաշենկոն:
Կիևը, ինչպես գրում են արևմտյան դիտորդները, չի հանձնվում և շարունակում է ժխտել զիջումների գնալու հնարավորությունը:
ՆԱՏՕ-ի պաշտոնյան ներողություն է խնդրել Ուկրաինայից տարածքային զիջումների մասին իր խոսքերի համար: Նորվեգական հրատարակությանը տված հարցազրույցում կազմակերպության գլխավոր քարտուղարի անձնական գրասենյակի տնօրեն Ստիան Յենսենն ասել է, որ իր հայտարարությունը Ուկրաինայում իրադարձությունների զարգացման հնարավոր սցենարների վերաբերյալ ավելի լայն քննարկման մի մասն է, և որ ինքը չպետք է օգտագործեր այդպիսի պարզեցված ձևակերպում:
Երեքշաբթի օրը «Արենդալի շաբաթ» բանավեճի ժամանակ Յենսենն ասել էր. - «Կարծում եմ՝ լուծումը կարող է լինել Կիևի կողմից տարածքը զիջելը և դրա դիմաց ՆԱՏՕ-ին անդամակցելը»: Այս խոսքերը հարուցել էին Կիևի սուր քննադատությունը։
Իր հերթին, դաշինքի գլխավոր քարտուղարն այսօր շեշտել է․ թե ՆԱՏՕ-ն կաջակցի Կիևին մինչև հաղթանակ։ Միաժամանակ, Ստոլտենբերգը խոստովանել է, որ ՆԱՏՕ-ում շարունակվում են ներքին քննարկումներն այն մասին, թե ինչպես վերջ տալ այս պատերազմին և հասնել խաղաղության տարածաշրջանում։
Վլադիմիր Զելենսկին ասել է, որ Ուկրաինան մտադիր է զգալիորեն մեծացնել մարտական անօդաչու թռչող սարքերի արտադրությունը։
«Նման հարցերի պատասխանը ներառում է մեր աշխատանքը գործընկերների հետ՝ ապահովելու անհրաժեշտ անօդաչու սարքերի և համակարգերի մատակարարումը, ինչպես նաև աշխատանքն այստեղ՝ Ուկրաինայում։ Մենք զգալիորեն ավելացնում ենք սեփական արտադրությունը», - հայտարարել է Ուկրաինայի նախագահը:
Ավելի վաղ ուկրաինական կողմը պայմանավորվել էր թուրքական «Բայրաքթար» ընկերության հետ Ուկրաինայի տարածքում անօդաչուների գործարան հիմնելու և դրանք արտադրելու մասին:
Ուկրաինայի իշխանությունները հակահարձակման դանդաղ ընթացքի պատճառներից մեկը համարում են արևմտյան սպառազինության պակասը։ Մասնավորապես, Կիևն այդքան սպասված F-16 կործանիչները չի ստանա ոչ աշնանը, ոչ էլ նույնիսկ ձմռանը, ուկրաինական հեռուստատեսության եթերում հայտնել է Ուկրաինայի ԶՈՒ ռազմաօդային ուժերի պաշտոնական ներկայացուցիչ Յուրի Իգնատը։
Այդ կործանիչների հետ մեծ հույսեր կային, Իգնատի խոսքով՝ դրանք կարող էին դառնալ երկրի հակաօդային պաշտպանության մի մասը և օգնել պաշտպանվել ռուսական հրթիռներից ու անօդաչու թռչող սարքերից:
Միաժամանակ, պաշտոնյան նշել է, որ ուկրաինացի օդաչուների ու անձնակազմի պատրաստման հարցը «գործնականում սկսել է տեղից շարժվել»։
Ուկրաինայի զինված ուժերի գխավոր շտաբի օգոստոսի 17-ի առավոտյան հրապարակած ամփոփագրում նշված է, որ անցած մեկ օրվա ընթացքում ճակատային գծում երկու տասնյակ ռազմական բախումներ են տեղի ունեցել։
Թե՛ ուկրաինական, թե՛ ռուսական զորքերը տարբեր ուղղություններով հարձակողական գործողություններ են իրականացնում, բայց լուրջ ճեղքումներ չեն արձանագրվել։