Ռուսաստանի Դաշնության արտաքին գերատեսչության ղեկավար Սերգեյ Լավրովն այսօր ռադիոկայաններին տված ասուլիսում հայտարարել է, որ Ռուսաստանը պատերազմ չի ուզում, բայց և թույլ չի տա անտեսել իր շահերն անվտանգության ասպարեզում:
«Եթե դա կախված է Ռուսաստանի Դաշնությունից, ապա պատերազմ չի լինի, մենք չենք ուզում պատերազմներ, բայց և թույլ չենք տա կոպտորեն ոտնահարել և անտեսել մեր շահերը», - հայտարարել է արտգործնախարարը:
Նա նշել է, որ անվտանգության հարցերի շուրջ Միացյալ Նահանգների և ՆԱՏՕ-ի հետ բանակցությունները դեռ չեն ավարտվել:
«Ինչպես գիտեք, ամերիկացիները և ՆԱՏՕ-ականները մեկ ամսից ավելի վերլուծել են մեր առավել քան պարզ առաջարկները, որոնք ներկայացված են Վաշինգտոնի և Հյուսիսատլանտյան դաշինքի հետ պայմանագրերի նախագծերում: Եվ մենք միայն նախանցյալ օրը ստացանք պատասխանները: Դրանցում շատ բաներ շփոթություն ստեղծելու նպատակով զուտ արևմտյան ոճով աղավաղված են, բայց երկրորդական խնդիրների վերաբերյալ կան ռացիոնալ հատիկներ», - ասել է Լավրովը:
Արտգործնախարարի փոխանցմամբ, Ռուսաստանը պատրաստում է անվտանգության երաշխիքների վերաբերյալ Միացյալ Նահանգների և ՆԱՏՕ-ի պատասխաններին արձագանքելու մի քանի տարբերակներ, որոշումն այդ հարցում կընդունի նախագահ Վլադիմիր Պուտինը:
