Նախագահ Արմեն Սարգսյանի մտահոգությունները վերաբերել և վերաբերում են պետության առջև ծառացած իրական խնդիրներին ու մարտահրավերներին, որոնց դիմակայելն ու լուծման ճանապարհներ գտնելն այսօրվա և բոլորի գերխնդիրն է, հայտարարում է նախագահի աշխատակազմը:
«Վերջին օրերին տարբեր անհատների, քաղաքական գործիչների, քաղաքագետների, ներկա կամ նախկին պատգամավորների, վերլուծաբանների և «կանխատեսողների» կողմից հնչում են տարբեր մտքեր, պնդումներ և համոզմունքներ, ներկայացվում են տարբեր մտացածին պատմություններ ու պատումներ: Հանրապետության նախագահի աշխատակազմը չի պատրաստվում մեկնաբանել դավադրության տեսությունների և քաղաքական առասպելաբանության այդ դրսևորումները», - ասված է հրաժարական ներկայացրած նախագահի աշխատակազմի հայտարարության մեջ:
Հրաժարականի տեքստում Սարգսյանը որոշումը պատճաբանել էր Սահմանադրությամբ նախագահի սահմանափակ լիազորություններով և արտաքին ու ներքին քաղաքականության վրա ազդել չկարողանալու հանգամանքով, ինչպես նաև խոսել էր տարբեր քաղաքական խմբավորումների կողմից իր և իր ընտանիքի թիրախավորման, դավադրական զանազան տեսությունների մասին։ Թե կոնկրետ ինչ նկատի ուներ այս դեպքում, չէր մանրամասնել։
