Թուրքիայի նախագահ Ռեջեփ Թայիփ Էրդողանը երեկվա կառավարության նիստից հետո զրուցել է լրագրողների հետ, ասելով, թե իրեն տխրեցրել է 2021 թվականին արձանագրված սղաճը, որը հասել է 36.1 տոկոսի և հավաստիացրել է, որ կառավարությունն ամեն ինչ կանի իրավիճակը շտկելու համար:
«Ինչպես և շատ երկրներում, Թուրքիայում էլ կա սղաճ, 2021-ին այն գերազանցել է 36 տոկոսը: Ինձ շատ է տխրեցնում այն, որ մեր քաղաքացիները՝ անկախ հանգամանքներից, այդպիսի վնաս են կրում»,- ասել է Էրդողանը:
Թուրքիայի նախագահի փոխանցմամբ, ինֆլյացիայի պատճառներն են համաշխարհային շուկաներում ապրանքների գների աճը ազգային տարադրամի՝ լիրայի մոտ 44 տոկոսի արժեզրկումը:
Նա հավաստիացրել է, որ կառավարությունն անպայման կվերլուծի գնաճի հետ կապված խնդիրները և միջոցներ կձեռնարկի քաղաքացիական սեկտորի աշխատողներին ու թոշակառուներին սատարելու համար:
Միայն դեկտեմբերին Թուրքիայում սղաճը հասել է 13.5 տոկոսի, ինչը ծանր սոցիալական ճգնաժամ է առաջացրել:
Լիրան արժեզրկվել է այն բանից հետո, երբ հետևելով Էրդողանի վարչակազմի պահանջներին` Թուրքիայի կենտրոնական բանկը սկսել է նվազեցնել տոկոսադրույքը:
Վերլուծաբանների փոխանցմամբ, Էրդողանի կառավարությունը ղեկավարվել է վարկավորումը և արտահանումը խթանելու նպատակով և անտեսել է ազգային տարադրամի ու գների խնդիրը:
Որոշ տնտեսագետներ ենթադրում են, որ եթե այդ քաղաքականությունը չվերանայվի, Թուրքիայում սղաճը գարնանը կհասնի 50 տոկոսի: Թուրքիան սղաճի ցուցանիշով այսօրվա դրությամբ աշխարհում 8-րդ տեղում է:
