Ռուսաստանն այսօր պաշտոնապես հայտարարեց, որ այլևս «Բաց երկնքի» պայմանագրի անդամ չէ ու պայմանագրից դուրս գալու մեղքը բարդեց Միացյալ Նահանգների վրա։
Ռուսաստանի ԱԳ նախարարության դեկտեմբերի 18-ի հայտարարությունում նշված է, որ պայմանագրի խզման պատասխանատուն ԱՄՆ-ն է։ Ըստ Մոսկվայի՝ Վաշինգտոնը հանդես էր գալիս ռազմական ոլորտում թափանցիկության օգտին, բայց չէր շտապում բացել իր տարածքը։
«Բաց երկնքի» պայմանագիրը կոչված է ամրապնդելու միջազգային անվտանգությունն ու վստահությունը, թույլատրելով նաև դիտորդական թռիչքներ իրականացնել։
Ավելի վաղ պայմանագրից դուրս էր եկել Միացյալ Նահանգները։
