Միացյալ Նահանգների և Ռուսաստանի արտգործնախարարները քննարկել են իրավիճակը Հարավային Կովկասում, հայտարարել է պետքարտուղարությունը երկու բարձրաստիճան դիվանագետների միջև այսօր Ստոկհոլմում կայացած հանդիպումից հետո։
«Պետքարտուղարը ողջունել է ուղիղ բանակցությունների վերսկսումը Հայաստանի և Ադրբեջանի կառավարությունների միջև»,- ասված է ամերիկյան կողմի հաղորդագրության մեջ։
Հանդիպման օրակարգում են եղել նաև իրավիճակը ռուս-ուկրաինական սահմանին, ինչպես նաև երկկողմ հարաբերությունները։ «Պետքարտուղարն ու Ռուսաստանի արտգործնախարարն ընդգծել են համագործակցության շարունակության կարևորությունն այն ոլորտներում, որտեղ կողմերի շահերը համընկնում են, այդ թվում՝ միջուկային զենք ունենալու Իրանի ջանքերը արգելափակելու հարցում»,- հայտարարել է ԱՄՆ պետդեպարտամենտը։
