Երեքշաբթի երեկոյան Թուրքիայի խոշոր քաղաքներում սկսված հակաիշխանական ցույցերը շարունակվել են նաև երեկ՝ հանդիպելով ոստիկանության դիմադրությանը: Ստամբուլի մի շարք թաղամասերում փողոց դուրս եկած ցուցարարները կրկին պահանջել են կառավարության հրաժարականն ու արտահերթ ընտրություններ:
Ոստիկանությունը շրջափակել է քաղաքի կենտրոնական հրապարակները՝ արգելելով ցուցարարների մուտքը, բողոքի դուրս եկած քաղաքացիների դեմ ջրաշիթեր են կիրառվել, Ստամբուլում 70 հոգի է ձերբակալվել, 4-ն էլ ՝Մերսին քաղաքում:
Իրավապահները նաև ուսումնասիրում են սոցցանցերի շուրջ 300 օգտահաշիվներ՝ հանրության մեջ ապատեղեկատվություն տարածելու և ցույցեր հրահրելու հիմքով:
Նախագահ Էրդողանի տնտեսական նոր մոդելի քաղաքականությունը արդեն մեկ տարի է աստիճանաբար արժեզրկում է թուրքական լիրան՝ իր հետ բերելով անխուսափելի գնաճ ու քաղաքացիների դժգոհություն: Մարդկանց վրդովմունքը, սակայն, հասավ կիզակետին «սև երեքշաբթի», երբ ազգային արժույթը մեկ օրում արժեզրկվեց ավելի քան 15 տոկոսով՝ հասնելով ռեկորդային ցածր ցուցանիշի:
Ընդհանուր առմամբ, անցած մեկ տարում լիրան արժեզրկվել է մոտ 40 տոկոսով՝ արձանագրելով վատագույն ցուցանիշը զարգացող երկրների արժույթների շարքում։ Չնայած վերջին երկու օրվա ընթացքում ազգային արժույթը փոքր-ինչ բարելավել է դիրքերը, սակայն քաղաքացիների դժգոհությունը միևնույնն է չի մեղմվում։
Կյանքը թանկացել է, մարդիկ վստահություն չունեն վաղվա օրվա հանդեպ: Երեկ մայրաքաղաք Անկարայի լցակայաններում երկար հերթեր էին գոյացել: Գազի ու բենզինի մոտալուտ թանկացման մասին լսած վարորդները բողոքում էին տնտեսական վատ վիճակից:
«Այսքան մարդ հերթ է կանգնել տնտեսական այս բարդ պայմաններում գոնե 30 լիրա խնայելու համար: Այս պատկերը ցույց է տալիս երկրի տնտեսական վիճակը»:
«Ես 45 տարեկան եմ, իսկ այս իշխանությունը արդեն 20 տարի է երկրի ղեկին է: Ամեն ելույթում հիշատակում էին այն ժամանակվա գազի կամ այլ բաների հերթերը: Հիմա կարծես նոստալգիա ենք ապրում: Կարոտել էինք: Ես այս տարիքի եմ, բայց նման բան չեմ հիշում: Շնորհակալ ենք այս նոստալգիայի համար»:
Վերջին հաշվարկներով, մեկ տարվա կտրվածքով Թուրքիայում գնաճը շուրջ 20 տոկոսի է հասնում: Դոլարի նկատմամբ լիրայի փոխարժեքի կտրուկ տատանումների պատճառով մի շարք արտասահմանյան ընկերություններ, այդ թվում ամերիկյան Apple-ի առցանց խանութը, Թուրքիայում դադարեցրել են ապրանքների վաճառքը:
Երկրի առաջ ծառացած տնտեսական լուրջ խնդիրներն ու բարձրացող բողոքի ձայները օրակարգ են բերել արտահերթ ընտրությունների անցկացման հարցը: Ու չնայած նախագահ Թայիփ Էրդողանը պնդում է, թե ընտրությունները ժամանակից շուտ չեն անցկացվելու, ընդդիմության շարքերում արդեն արտահերթի հնարավոր ժամկետի մասին են խոսում:
Թուրքական Haber Türk-ը գրում է, թե արտահերթ ընտրությունների հավանականությունը նույնիսկ իշխանական կուլիսներում է քննարկվում։ Ըստ լրատվամիջոցի՝ մինչ ընդդիմությունը զանգվածային ցույցեր է ծրագրում՝ նպատակ ունենալով գարնանը արտահերթի հասնել, իշխանությունները հույս ունեն ժամանակ շահել մինչև 2022-ի նոյեմբեր, երբ ճգնաժամը հաղթահարված կլինի։
Հերթական խորհրդարանական և նախագահական ընտրությունները Թուրքիայում պետք է կայանան 2023-ի հունիսին։
