Հատուկ չվերթով Բաքվից այսօր Երևան է տեղափոխվել երեկ ծավալված մարտերի ընթացքում զոհված ՀՀ ԶՈւ զինծառայողի մարմին` գեներալ-լեյտենանտ Ռուստամ Մուրադովի միջնորդությամբ, հայտնում է Պաշտպանության նախարարությունը:
Ռազմական գերատեսչությունը ավելի վաղ հաղորդել էր մեկ զոհի մասին:
Մուրադովին ընդունել է պաշտպանության նորանշանակ նախարար Սուրեն Պապիկյանը` ներկայացնելով ռազմական գործողությունների մանրամասները, ինչպես նաև տվյալներ հաղորդել գերեվարված հայ զինծառայողների վերաբերյալ, որոնց թիվը, նախնական տվյալներով, 13-ն է:
Պայմանավորվածություն է ձեռք բերվել շարունակել ինտենսիվ աշխատանքները ինչպես գերեվարված զինծառայողների վերադարձի, այնպես էլ մարտի արդյունքում անհայտ կորած զինծառայողների հայտնաբերման ուղղությամբ, հավելում է պաշտպանական գերատեսչությունը:
Շուրջ 6 ժամ տևած մարտական գործողությունների հետևանքով հայկական կողմը պաշտոնական տվյալներով բացի մեկ զոհից, ունի 24 անհետ կորած: Պաշտպանության նախարարության հաղորդմամբ՝ նրանց հետ կապը կորել է մարտական գործողությունների ընթացքում։ Այս 24 զինծառայողների հայտնաբերման աշխատանքներ են ընթանում, ներգրավված են նաև ռուս խաղաղապահները։
Ադրբեջանը պաշտոնապես հայտնում է 7 զոհի և 10 վիրավորի մասին։
Երեկ 18:30-ից արևելյան սահմանագոտում կրակը դադարեցվեց՝ ռուսական կողմի միջնորդությամբ: Պաշտպանության գերատեսչության տեղեկացմամբ՝ այսօր իրավիճակը հարաբերական կայուն է եղել, կրակի դադարեցման պայմանավորվածությունը պահպանվում է։
