Պեկինն արդեն դատապարտել է այցը:
Եվրամիության պատվիրակությունն առաջին անգամ պաշտոնական այց է կատարել Թայվան: Պեկինը կղզին համարում է Չինաստանի անբաժան մաս և մշտապես ու խստորեն դատապարտում է Թայվանի հետ օտարերկրացիների քաղաքական կապերը:
«Մենք ժամանել ենք շատ պարզ և միանշանակ պատգամով՝ դուք միայնակ չեք, Եվրոպան ձեզ հետ է և սատարում է ձեր ազատությանը, օրենքի գերակայությանը և մարդկային արժանապատվությանը»,- ասել է Եվրախորհրդարանի պատվիրակության ղեկավար, ֆրանսիացի պատգամավոր Ռաֆայել Գլյուկսմանը:
«Ջերմորեն ողջունում ենք պարոն Գլյուկսմանի ղեկավարած պատվիրակությանը, դա Եվրախորհրդարանի պատգամավորների առաջին այցն է, այն մեծ նշանակություն ունի Թայվանի համար»,- ասել է նախագահ Ցայ Ին Վենը:
Եռօրյա այցը կազմակերպել է Եվրախորհրդարանի արտաքին հարաբերությունների և դեմոկրատական գործընթացների հանձնաժողովը:
Եվրամիության պատգամավորները և Թայվանի պաշտոնյաները քննարկելու են ապատեղեկատվության տարածման և կիբերգրոհների դեմ պայքարելու ուղիները:
Աշխարհում մեծ թվով պետություններ, չցանկանալով սրել հարաբերությունները պաշտոնական Պեկինի հետ, հրաժարվում են հյուրընկալել Թայվանի բարձրաստիճան ղեկավարներին:
Եվրամիությունը Թայվանի հետ դիվանագիտական կապեր չունի, միայն Վատիկանը պաշտոնական մակարդակով որոշակի հարաբերություններ է հաստատել կղզու հետ:
Չինաստանն արդեն քննադատել է Եվրախորհրդարանի պատգամավորներին Թայվան մեկնելու համար:
«Եվրոպան չպետք է սխալ ազդակներ ուղարկի Թայվանի անջատականներին, քանի որ դա կարող է վնաս հացնել Չինաստանի և Եվրամիության հարաբերություններին»,- այսօր ասել է Չինաստանի արտաքին գործերի նախարարության խոսնակ Վան Վենբինը:
