Հացադուլի մեջ գտնվող Վրաստանի նախկին նախագահ Միխեիլ Սաակաշվիլիի առողջական վիճակը բանտում վատթարացել է և պահանջվել է արյան փոխներարկում: Այդ մասին հայտնել է Սաակաշվիլիի անձնական բժիշկ Նիկոլոզ Կիպշիձեն:
«Փոխներարկումը հաջող է կատարվել, մեզ օգնեցին բանտի բժիշկները և շտապօգնության խումբը, դեռևս ամեն ինչ լավ է»,- ասել է Կիպշիձեն:
Նրա խոսքով, բանտի բժշկական կաբինետը նախատեսված չէ նման աշխատանքի համար, և փոխներարկումը կատարվել է «դաշտային պայմաններում»:
Կիպշիձեն հայտարարել է, որ Սաակաշվիլիին անհրաժեշտ է փոխադրել քաղաքացիական հիվանդանոց:
Վրաստանի երրորդ նախագահը կալանավորվել է հոկտեմբերի 1-ին, նա Ռուսթավիի քրեակատարողական հիմնարկում հացադուլ է հայտարարել:
Վրաստանում նա մեղադրվում է մի շարք հոդվածներով, այդ թվում՝ բանկիր Սանդրո Գիրգվլիանիի սպանության, պատգամավոր Վալերի Գելաշվիլիին ծեծի ենթարկելու և բողոքի ցույցերը բիրտ ուժով ցրելու հրամանի արձակման գործերով: Սաակաշվիլին կտրականապես հերքում է մեղադրանքները:
