Հայաստանի առջև եղած մարտահրավերներն առաջին հերթին անվտանգային են, որոնք կառավարելու, նպաստավոր արտաքին միջավայր ձևավորելու համար անհրաժեշտ է Արտաքին գործերի նախարարություն և դիվանագիտական ծառայություն, որը կկարողանա վերցնել իր վրա և կիսել քաղաքական պատասխանատվությունը երկրի այսօրվա և ապագայի համար: Այսօր այս մասին Արտգործնախարարությունում նորանշանակ նախարար Արարատ Միրզոյանին ներկայացնելիս ասել է վարչապետ Նիկոլ Փաշինյանը:
Արտաքին քաղաքականության գերատեսչության պատասխանատուն շեշտել է, որ ջանք ու եռանդ չեն խնայելու, որ Հայաստանը հնարավոր լավագույն կերպով հաղթահարի առկա մարտահրավերները, անցնի եղած փորձությունների միջով, հավաստիացրել է. «Մենք փորձելու ենք մեր համեստ ներդրումն ունենալ, որպեսզի հնարավոր լավագույն, անվտանգ, խաղաղ, զարգացող հանգրվանի հասցնենք մեր երկիրը»:
Ազգային ժողովի նախկին նախագահ Արարատ Միրզոյանը երկու օր առաջ նշանակվեց երեք ամիս թափուր մնացած արտաքին գործերի նախարարի պաշտոնում։ Իսկ 33 օր արտաքին գործերի նախարարի պարտականությունները կատարած Արմեն Գրիգորյանը ազատվել է առաջին տեղակալի պաշտոնից ու նշանակվել իր նախկին՝ անվտանգության խորհրդի քարտուղարի պաշտոնում։
Հիշեցնենք նաև, որ նախկին արտգործնախարար Արա Այվազյանը հրաժարական էր ներկայացրել մայիսի 27-ին, հրաժարականի պատճառների մասին խոսելով էլ, մասնավորապես ասել, թե իր որոշումը պայմանավորված էր հենց այն պատճառով, «որպեսզի երբևիցե որևէ կասկած չլինի, որ այս նախարարությունը կարող է ինչ-որ քայլ անել կամ համաձայնություն տալ ինչ-որ գաղափարների, նախաձեռնությունների, որոնք մեր պետականության, մեր ազգային և պետական շահի դեմ են եղել»։
