Եվրոպական հանձնաժողովի հարևանության և ընդլայնման հարցերով հանձնակատար Օլիվեր Վարհեին հուլիսի 6-9-ը կայցելի Վրաստան, Ադրբեջան և Հայաստան:
Հայաստանում Եվրամիության պատվիրակության հաղորդագրության համաձայն՝ սա հանձնակատարի առաջին այցն է Հարավային Կովկասի տարածաշրջանի երկրներ: Քաղաքական իշխանության, գործարար միջավայրի ներկայացուցիչների և քաղաքացիական հասարակության դերակատարների հետ հանդիպումների ընթացքում Վարհեին կներկայացնի տարածաշրջանային տնտեսական և ներդրումային պլանը և յուրաքանչյուր երկրի համար առաջատար կարևորության ծրագրերը: Երեք երկրներից յուրաքանչյուրի հետ նա կքննարկի երկկողմ հարաբերությունների առանցքային հարցեր:
Հանձնակատարի այցի նպատակն է հաստատել Եվրամիության համերաշխությունը գործընկեր երկրներին՝ COVID-19 համավարակի դեմ պայքարում:
Հայաստանում Օլիվեր Վարհեին կհանդիպի նախագահ Արմեն Սարգսյանի, վարչապետի պաշտոնակատար Նիկոլ Փաշինյանի, փոխվարչապետի պաշտոնակատար Մհեր Գրիգորյանի և Ամենայն Հայոց Գարեգին երկրորդ կաթողիկոսի հետ:
Վրաստանում Օլիվեր Վարհեին կհանդիպի վարչապետ Իրակլի Ղարիբաշվիլիի, ԱԳ նախարար Դավիթ Զալկալիանիի, խորհրդարանի խոսնակ Կախաբեր Կուչավայի և քաղաքական կուսակցությունների ներկայացուցիչների, ինչպես նաև Պատրիարք Իլյա երկրորդի հետ:
Ադրբեջանում հանձնակատարը հանդիպումներ կունենա ԱԳ նախարար Ջեյհուն Բայրամովի, նախագահի աշխատակազմի ղեկավար Սամիր Նուրիևի, էկոնոմիկայի նախարարի և էներգետիկայի նախարար Փարվիզ Շահբազովի հետ:
