Եվրամիությունն ուշադրությամբ հետևում է Հայաստանի ու Ադրբեջանի սահմանին ստեղծված «մտահոգիչ» վիճակին, հայտարարել է միության արտաքին քաղաքականության հարցերով գլխավոր հանձնակատարը:
Ժոզեպ Բորելը տեղեկացրել է, որ իր հանձնարարությամբ, ԵՄ արտաքին քաղաքական գերատեսչության գլխավոր քարտուղար Ստեֆանո Սանինոն երեկ հեռախոսազրույց է ունեցել Հայաստանի արտգործնախարարի պաշտոնակատարի, այսօր` Ադրբեջանի արտգործնախարարի հետ` կոչ անելով երկու կողմին ծայրահեղ զսպվածություն ցուցաբերել և թուլացնել լարվածությունը:
Բորելի փոխանցմամբ՝ Հարավային Կովկասի հարցերով ԵՄ հատուկ ներկայացուցիչ Տոյվո Կլաարն, իր հերթին, շփումների մեջ է ԵԱՀԿ նախագահության հետ:
«Սահմանի դեմարկացիան և դելիմիտացիան պետք է իրագործվեն բանակցությունների ճանապարհով` հօգուտ տեղի բնակիչների անվտանգության: Մենք ողջունում ենք կողմերի միջև տեխնիկական մակարդակում շարունակվող շփումները», ֊ հայտարարել է ԵՄ արտաքին գործերի նախարարը:
Պաշտոնական Երևանը հաղորդում է մայիսի 12-ից Սյունիքի և Գեղարքունիքի մարզերի տարածքներում Ադրբեջանի զինված ուժերի կողմից Հայաստանի պետական սահմանի խախտման և առաջխաղացման մասին: Հայաստանն այդ առնչությամբ պաշտոնապես դիմել է Հավաքական անվտանգության պայմանագրի կազմակերպությանը, որին անդամակցում է, և դաշնակից Ռուսաստանին:
Պաշտոնական Բաքուն պնդում է, թե ադրբեջանական բանակն «ուղղակի զբաղեցնում է իր դիրքերը»:
Կողմերի միջև բանակցություններ են ընթանում, առայժմ՝ անարդյունք:
