Երևան ժամանած Ռուսաստանի կառավարության նախագահի տեղակալ Ալեքսեյ Օվերչուկին երեկ երեկոյան ընդունել է Հայաստանի վարչապետ Նիկոլ Փաշինյանը։
Զրուցակիցները քննարկել են Հայաստանի, Ռուսաստանի և Ադրբեջանի փոխվարչապետների գլխավորությամբ ստեղծված աշխատանքային խմբի գործունեությանը, տարածաշրջանային կոմունիկացիոն ենթակառուցվածքների ապաշրջափակման հնարավորություններին և այս ուղղությամբ տարվող աշխատանքներին վերաբերող հարցեր։
Առանձնակի ընդգծվել է հումանիտար պայմանավորվածությունների կատարման կարևորությունն ու տարածաշրջանում կայունության ամրապնդման անհրաժեշտությունը, ասված է Հայաստանի վարչապետի աշխատակազմի տեղեկատվության և հասարակայնության հետ կապերի վարչության հաղորդագրությունում։
Մտքեր են փոխանակվել նաև հայ-ռուսական տնտեսական համագործակցության օրակարգային հարցերի շուրջ։
Ռուսաստանի փոխվարչապետին նույն օրը ավելի վաղ ընդունել էր Հայաստանի փոխվարչապետ Մհեր Գրիգորյանը։ Օվերչուկը Երևան է ժամանել Բաքվից, որտեղ հանդիպել է Ադրբեջանի նախագահի և այլ պաշտոնյաների հետ։
Հիշեցնենք՝ Ալեքսեյ Օվերչուկը, Մհեր Գրիգորյանը և Ադրբեջանի փոխվարչապետ Շահին Մուստաֆաևը եռակողմ աշխատանքային խմբի համանախագահներն են։
