Կորոնավիրուսի դեպքերի աճին զուգահեռ եվրոպական մի շարք պետություններ կրկին խստացնում են հակահամաճարակային միջոցառումները։ Գերմանիայի առողջապահության նախարար Յենս Շպանը հայտարարել է, որ երկիրը ևս մեկ լոքդաունի կարիք ունի, որը պետք է տևի 10-ից 14 օր։
«Հակառակ դեպքում մեզ չի հաջողվի վերահսկել վիրուսի տարածումը». - հայտարարել է գերմանացի նախարարը։ Ֆրանսիայի իշխանությունները հայտարարել են, որ իրադրությունը օրհասական է՝ հակահամաճարակային միջոցառումները խստացնելով երկրի ևս 3 շրջաններում։
Այսպիսով, այսօրվա դրությամբ լոքդաուն է հայտարարված Ֆրանսիայի 101 դեպարտամենտներից 19-ում։ Լեհաստանի կառավարությունը ևս հայտարարել է հակահամաճարակային նոր միջոցառումների կիրառման մասին։ Վաղվանից փակվելու են երկրի տարածքում գործող բոլոր մանկապարտեզները, խաղահրապարակները, կահույքի խանութները և գեղեցկության սրահները։
