Լոնդոնի ոստիկանությունը նախնական քննություն է սկսել Սիրիայի նախագահ Բաշար ալ-Ասադի տիկնոջ` Ասմա Ասադի դեմ, որի արդյունքում վերջինս կարող է զրկվել բրիտանական քաղաքացիությունից` սիրիական ընդդիմության դեմ արդեն տասը տարի շարունակվող բռնաճնշումներին մեղսակցելու համար:
Քննությունն անցկացնում է Սքոթլընդ Յարդի պատերազմական հանցագործությունների վարչությունը, հաղորդում է Sunday Times֊ը: Ըստ հրապարակման, չի բացառվում, որ ավարտին Սիրիայի առաջին տիկինը կարող է կանգնել նաև բրիտանական դատարանի առաջ:
«2011֊ի մարտից Սիրիայի հարյուր հազարավոր քաղաքացիներ սպանվել են, ազատազրկվել կամ կտտանքների ենթարկվել», ֊ հայտարարել են հայցը ներկայացրած փաստաբանները, պնդելով` Ասմա Ասադը բազմիցս իր աջակցությունն է հայտնել ուժայինների այդ գործողություններին:
Արդեն տասը տարի սիրիական ընդդիմության ու իշխանության միջև շարունակվող բախումներում սպանվել է շուրջ 400 հազար մարդ, տեղահանվել՝ ավելի քան 12 միլիոնը: Ի տարբերություն Լիբիայի և Եգիպտոսի, որտեղ բողոքի ցույցերը հանգեցրին իշխանափոխության, Սիրիայում Բաշար Ասադը մնաց իր պաշտոնում` Ռուսաստանի աջակցությամբ:
