Երեկվա հանրահավաքում վարչապետը խոսեց սահմանադրական հանրաքվով Հայաստանում կառավարման խորհրդարանական համակարգը փոխելու, կիսանակախագահականին վերադառնալու մտադրության մասին։
Ասաց՝ այսօր էլ Սահմանադրությունը բազմաթիվ ճգնաժամային ռիսկեր է ստեղծում․ - «Կարծում եմ, ժամանակն է արձանագրել, որ մենք պիտի աշխատենք, որ այս տարվա հոկտեմբեր ամսին համաժողովրդական հանրաքվեով ընդունենք նոր Սահմանադրություն կամ սահմանադրական փոփոխություններ, և ի վերջո կիսանախագահական կառավարման համակարգի անցնելը հնարավոր տարբերակներից մեկը պետք է լինի»։
Իսկ ընդամենը մեկ տարի առաջ Փաշինյանը տրամագծորեն հակառակ կարծիքին էր, որ կիսանախագահական համակարգը երկիրը ձախողած, անպատասխանատու համակարգ է․ - «Էս տարբերակը Հայաստանի համար պետք է բացառել։ Իմ կարծիքը հետևյալն ա, որ մենք կառավարման համակարգ չպետք է փոխենք առնվազն էնքան ժամանակ, մինչև չենք համոզվել, որ էս կառավարման համակարգը մեզ համար պրոբլեմ է։ Էս կառավարման համակարգը մինչև էս պահը նոր ա, էկեք տեսնենք ինչ ա տեղի ունենում։ Փառք Աստծո, ամեն ինչ լավ ա»։
Իշխանական «Իմ քայլից» ԱԺ փոխխոսնակ Ալեն Սիմոնյանը չթաքցրեց՝ վարչապետի ասած ճգնաժամերից մեկն էլ վերջին օրերին ԶՈՒ ԳՇ պետ Օնիկ Գասպարյանին աշխատանքից ազատելու շուրջ Նիկոլ Փաշինյանի ու Արմեն Սարգսյանի միջև լարվածությունն է․ - «Պարզ օրինակ․ Հանրապետության նախագահի պարագայում կա մի իրավիճակ, երբ որ երկրի ղեկավարը (էկեք վերանանք, թե ով է երկրի ղեկավարը, ենթադրենք Նիկոլ Փաշինյանի չի, որևիցե մեկ այլ անձնավորություն է) պաշտոնից ազատելու որոշում է կայացնում, և առաջանում է նման խնդիր, որ փաստացի չի լինում ազատել, ինչ-որ վակուում է առաջանում»։
«Պարոն Փաշինյանը սովոր չէ, երբ որ իր կամքին որևէ մեկը հակադրվում է։ Եվ երբ որ տեսավ, որ հակակշիռների, զսպումների համակարգը, որը մեր Սահմանադրության հիմքն է, աշխատեց ինչ-որ առումով, որոշեց, որ պետք է դա էլ վերացնել, որ միանձնյա լինի ցանկացած որոշում կայացնելը։ Նա ավտորիտար պետականություն է ուզում՝ իր բոլոր հնարավոր դրսևորումներով», - «Ազատության» հետ զրույցում ասաց Տարոն Սիմոնյանը («Լուսավոր Հայաստան»)։
Մինչ վարչապետը պատրաստվում է համակարգի փոփոխության հարցով համագործակցել նաև Ազգային ժողովի հետ, խորհրդարանի ընդդիմադիրները Փաշինյանի վերջին հայտարարությանը կոշտ են արձագանքում՝ որակելով նրա հերթական մանիպուլյացիաներից մեկը։
Տարոն Սիմոնյանը հայտարարում է՝ համակարգի արդյունավետությունը աշխատեցնողից է, իսկ Փաշինյանը իր ձախողումները ուզում է համակարգի վրա գցել։
Ընդդիմադիր պատգամավորն ասաց՝ կիսանախագահականին վերադառնալու հարց քննարկել են նաև անցած տարեսկզբին ձևավորված Սահմանադրական փոփոխությունների մասնագիտական հանձնաժողովում։ Ինքը այնտեղ էլ է դեմ արտահայտվել՝ պատճառաբանությամբ, թե պետականությունը չի կարելի անընդհատ ստրեսների ենթարկել։
Սիմոնյանի խոսքով, իր կարծիքը կիսել են նաև իշխանության ներկայացուցիչները․ - «Դա քաղաքական մանիպուլյատիվ հայտարարություն էր, որ ասի՝ տեսեք, ես չկարողացա պատերազմում հաղթանակ տանել, ես չկարողացա Զինված ուժերի հետ լավ լեզու գտնել, ես չկարողացա պետությունը նորմալ կառավարել, որովհետև պառլամենտական է։ Հիմա էկեք գնանք կիսանախագահականի․․․ Բայց մեղավորը անձն է, ոչ թե համակարգը»։
«Իշխանությունը պահպանելու համար արված հայտարարություն էր»․ սա ընդդիմադիր Նաիրա Զոհրաբյանի («Բարգավաճ Հայաստան»)գնահատականն է․ - «Ինքը այս պահին ցայտնոտի մեջ է, անգամ ամենաաննախադեպ վարչական ռեսուրս կիրառելով՝ ինքը կարողացավ բերման ենթարկել 20-23 հազար մարդ, իսկ դա իր համար փախողում է։ Հիմա ինքը, այսպես ասած կոդերով հնչեցնում է տարբերակներ, առաջարկներ՝ փորձելով դրա շուրջ ինչ-որ կոնսոլիդացիաներ անել, տեսնել, թե քաղաքական ուժերը այդ տարբերակներից որի շուրջ կգան իր հետ կոնսոլիդացիայի, որպեսզի ինքը կարողանա պահպանել իր իշխանությունը։ Ինչը չի լինելու»։
Ի դեպ, այսօր Փաշինյանի թիմակից Ալեն Սիմոնյանը չբացառեց, որ սահմանադրական փոփոխությունները այնպիսի ժամկետներում կազմակերպվեն, որ միանգամից նախագահական ընտրություններ անցկացվեն։
Սիմոնյանն անպատասխան թողեց հարցը, թե արդյոք Փաշինյանը ցանկանում է նախագահ դառնալ։
