Աշխատանքային այցով Ղազախստանում գտնվող վարչապետ Նիկոլ Փաշինյանն այսօր առավոտյան հանդիպում է ունեցել Ղրղըզստանի նորանշանակ վարչապետ Ուլուկբեկ Մարիպովի հետ:
Ըստ Հայաստանի վարչապետի գրասենյակի, Փաշինյանը նախ շնորհավորել է Մարիպովին վարչապետ նշանակվելու կապակցությամբ, ապա նշել է, որ Հայաստանը հետաքրքրված է գործընկերային կապերի խորացմամբ։
Ղրղղզստանի վարչապետն ընդգծել է, որ իր երկիրը կարևոր նշանակություն է տալիս Հայաստանի հետ գործընկերության սերտացմանը։ Նրա խոսքով՝ պետք է աշխատել առևտրատնտեսականից մինչ մշակութային-հումանիտար ոլորտներ գործակցությունը խորացնելու ուղղությամբ։
Զրուցակիցները վերահաստատել են փոխհարաբերությունները խորացնելու շահագրգռվածությունը:
Նիկոլ Փաշինյանը և Ուլուկբեկ Մարիպովը մտքեր են փոխանակել առևտրատնտեսական համագործակցության զարգացման շուրջ։ Այս համատեքստում անդրադարձ է եղել տարածաշրջանում տրանսպորտային կոմունիկացիաների վերաբացման և ճանապարհների ապաշրջափակման արդյունքում ստեղծվող հնարավորություններին, ենթակառուցվածքների զարգացման հեռանկարներին։
Կողմերը փոխանակվել են կորոնավիրուսի համավարակի հաղթահարման միջոցառումների վերաբերյալ տեղեկատվությամբ և պայմանավորվել ինտենսիվացնել բարձր մակարդակի փոխադարձ շփումները՝ համաճարակային իրավիճակի կայունացմանը զուգահեռ։
Նիկոլ Փաշինյանը Ղազախստան է մեկնել փետրվարի 4-ին՝ Ալմաթիում մասնակցելու Եվրասիական միջկառավարական խորհրդի հերթական նիստին և «Almaty Digital Forum 2021» միջազգային համաժողովին:
