Միջազգային օլիմպիական կոմիտեի նախագահ Թոմաս Բախն ասել է, որ Տոկիոյում այս տարվա ամռանը նախատեսված Ամառային խաղերը տեղի կունենան համաձայնեցված ժամանակացույցով:
Նրա փոխանցմամբ, կազմակերպիչների թիվ մեկ առաջնահերթությունը կլինի մասնակից մարզիկների անվտանգության ապահովումը:
Խաղերը պետք է տեղի ունենային անցյալ տարվա ամռանը, սակայն հաշվի առնելով կորոնավիրուսի համավարակի վտանգը, ՄՕԿ-ը և Ճապոնիայի կառավարությունը որոշել են Օլիմպիադան մեկ տարով հետաձգել:
«Խաղերից վեց ամիս առաջ ամբողջ օլիմպիական շարժումն անհամբերությամբ սպասում է հուլիսի 23-ին նախատեսված հանդիսավոր բացմանը: Այսօր ես ունեմ աշխարհի բոլոր 206 օլիմպիական ազգային կոմիտեներին դիմելու հնարավորություն, բոլորս պատրաստվում ենք խաղերին, մենք վայելում ենք Ճապոնիայի կառավարության լիակատար աջակցությունը: Բոլորը վճռական են անցկացնել խաղերը, դա է լույսը, որը տեսնում ենք՝ տակավին գտնվելով թունելում, մեր առաջնահերթությունը կլինի մարզիկների անվտանգությունը»,- տեսակապով դիմելով գործընկերներին՝ ասել է ՄՕԿ-ի ղեկավարը:
ՄՕԿ-ը և Ճապոնիայի կառավարությունը մշակում են տարբեր սցենարներ, այդ թվում՝ հարկ եղած դեպքում Օլիմպիադան առանց հանդիսականների անցկացնելու հնարավորությունը, սակայն դրա վերաբերյալ վերջնական որոշում դեռ չկա:
