Հայաստան են վերադարձել ինչպես սեպտեմբերի 27-ից լայնամասշտաբ պատերազմի ընթացքում գերության մեջ հայտնված զինվորական ծառայողներ և քաղաքացիական անձինք, այնպես էլ մինչև պատերազմը գերեվարված անձինք, որոնց իրավունքների պաշտպանությունը Մարդու իրավունքների եվրոպական դատարանում հանձնառել էին իրավապաշտպաններ Արտակ Զեյնալյանը և Սիրանուշ Սահակյանը:
Դեկտեմբերի 14-ին ռուս խաղաղապահների միջնորդությամբ տեղի ունեցավ գերիների փոխանակման գործընթաց. Ադրբեջանից Հայաստան տեղափոխվեցին պաշտոնապես հաստատված այն 44 հայ գերիները, որոնց գերեվարված լինելու փաստը հաստատված է Ադրբեջանի և Կարմիր խաչի կողմից։ Անհետ կորած և հնարավոր գերեվարված մյուս անձանց հայտնաբերման ու նրանց վերադարձի կազմակերպման գործընթացը շարունակվում է։
«Հայրենադարձվող անձանց կեսից ավելին հանդիսանում են այն գերիները, ում իրավունքների պաշտպանության նպատակով մենք Ադրբեջանի դեմ գանգատներ էինք ներկայացրել Եվրոպական դատարանին: Նրանց իրավունքների լիարժեք վերականգմանն ուղղված մեր հետագա քայլերի մասին դեռ կտեղեկացնենք հանրությանը: Միաժամանակ, վերահաստատում ենք դեռևս Ադրբեջանում պահվող մյուս հայ գերիների վերադարձմանն ուղղված մեր հետևողական քայլերի շարունակականությունը», - ֆեյսբուքյան իր էջում գրել է Արտակ Զեյնալյանը։
Հիշեցնենք՝ Մարդու իրավունքների եվրոպական դատարանը մինչև դեկտեմբերի 4-ը, իր տարածքում պահվող գերիների մասին մանրամասն տեղեկատվություն ներկայացելու վերջնաժամկետ էր սահմանել Ադրբեջանի համար։
Դեկտեմբերի 3-ի տվյալներով, ադրբեջանական գերության մեջ առնվազն 60 զինծառայող և 40 քաղաքացիական անձինք էին պահվում․ հայկական կողմն, ընդհանուր առմամբ, ավելի քան 50 գերիների հարցերով էր դիմել Եվրադատարան, դրանցից երկու տասնյակն ուղարկել էր ՄԻԵԴ-ում Հայաստանի կառավարության ներկայացուցիչ Եղիշե Կիրակոսյանի գրասենյակը, 30 գերու համար էլ ստրասբուրգյան դատարան դիմումներ էին ուղարկել իրավապաշտպաններ Սիրանույշ Սահակյանն ու Արտակ Զեյնալյանը։
