ԵԱՀԿ Մինսկի խումբը ոչ մի դերակատարում չի ունեցել Լեռնային Ղարաբաղի հակամարտության կարգավորման գործընթացում, համանախագահների հետ հանդիպմանը հայտարարել է Ադրբեջանի նախագահը: Իլհամ Ալիևը Բաքվում երեկ ընդունել է ԵԱՀԿ Մինսկի խմբի ֆրանսիացի համանախագահ Ստեֆան Վիսկոնտինին, ամերիկացի Էնդրյու Շոֆերին և Ադրբեջանում Ռուսաստանի դեսպան Միխայիլ Բոչարնիկովին։
«Մինսկի խումբը ոչ մի դերակատարում չի ունեցել հակամարտության կարգավորման գործընթացում: Չնայած Մինսկի խումբը հանդես է եկել գաղափարներով և փորձել է ստեղծագործական մոտեցում ցուցաբերել, սակայն դա ոչ մի արդյունք չտվեց», - շեշտել է Ալիևը` հավելելով, որ Մինսկի խումբը դրա լիազորությունն ուներ 28 տարի: Նաև նշել է, որ համաձայն է ՌԴ նախագահի այն խոսքերի հետ, որ ղարաբաղյան կոնֆլիկտն այլևս պատմության գիրկն է անցել, այսինքն` այն արդեն «լուծված է», և որ ինքը «ցույց տվեց, որ հակամարտությունը հնարավոր էր և լուծվեց ռազմական ճանապարհով»:
Ըստ Ադրբեջանի նախագահի` տարածաշրջանում այժմ բոլորովին նոր իրավիճակ է: Նա նաև անդրադարձել է հրադադարի վերահսկման և մոնիթորինգի ռուս-թուրքական համատեղ կենտրոնին` նշելով, որ այդ կենտրոնը կտեղակայվի Աղդամի տարածաշրջանում:
Ի դեպ, Ալիևը նաև ասել է, թե ԵԱՀԿ Մինսկի խմբի համանախագահների այցը Բաքու իրենց սեփական նախաձեռնությունն է, և ինքը նրանց չի հրավիրել: Սակայն երբ իրեն տեղեկացրել են այդ նախաձեռնության մասին, համաձայնել է: Հիշեցնենք, որ ռուսաստանցի համանախագահի փոխարեն հանդիպմանը մասնակցել է Ադրբեջանում ՌԴ դեսպանը։ Մինսկի խմբում ռուսաստանցի համանախագահ Իգոր Պոպովի բացակայության վերաբերյալ որևէ պարզաբանում չկա։
Ալիևը ևս մեկ անգամ ասել է, թե Հայաստանի վարչապետն է «կործանել բանակցությունները», շեշտել, թե «պատերազմական հանցագործներ են նաև նախկին ղեկավարներ Սարգսյանն ու Քոչարյանը», և որ իրենք նրանց ստեղծած բանակի դեմ են կռվել:
Ադրբեջանի ղեկավարը կարևորել է որակել համաձայնագրի այն կետը, որով երաշխավորվում է Ադրբեջանը Նախիջևանի հետ կապող տրանսպորտային հաղորդակցության անվտանգությունը:
