Ազգային ժողովի խորհրդի նիստը կրկին չկայացավ, հայտնում է «Լուսավոր Հայաստան» խմբակցության ղեկավար Էդմոն Մարուքյանը: Նրա ներկայացմամբ` «Իմ քայլը» դաշինքից ներկայացել է միայն ԱԺ փոխխոսնակ Լենա Նազարյանը:
ԱԺ արտահերթ նիստը նախաձեռնվել էր հետևյալ օրակարգով`
«Ստեղծված իրավիճակը և դրանից դուրս գալու ելքերը, ինչպես նաև Հայաստանի Հանրապետության վարչապետ Նիկոլ Փաշինյանի, Ադրբեջանի Հանրապետության նախագահ Իլհամ Ալիևի և Ռուսաստանի Դաշնության նախագահ Վլադիմիր Պուտինի կողմից 2020 թվականի նոյեմբերի 09-ին ստորագրված հայտարարության իրավաչափությունը քննարկելու վերաբերյալ» Ազգային ժողովի որոշման նախագիծը:
«Այս օրակարգով նիստին չներկայանալը նշանակում է, որ ԱԺ «Իմ քայլի» 88 պատգամավոր կողմ են, որ երկիրն այս վիճակում մնա` դրանից բխող բոլոր անդառնալի հետևանքներով», - գրել է Մարուքյանը:
Հիշեցնենք, որ ավելի վաղ հավաքվել էին արտահերթ նիստ գումարելու համար բավարար ստորագրությունները, սակայն նիստը կհրավիրվեր, եթե Ազգային ժողովի խորհրդի նիստ կայանար:
