Բելառուսի նախագահության նախկին թեկնածու Սվետլանա Տիխանովսկայան վերջնաժամկետ է տվել Ալեքսանդր Լուկաշենկոյին և նրա դեմ դուրս եկած հազարավոր ցուցարարների անունից պահանջել մինչև հոկտեմբերի 25-ը հրաժարական տալ։
«Մենք բազմիցս ենք հայտարարել, որ պատրաստ ենք երկխոսության ու բանակցությունների, սակայն զրույցը չի կարող կայանալ, երբ մի կողմը ճաղերի ետևում է», - հայտարարել է ընդդիմադիր առաջնորդը, պնդելով, թե իրենց համբերությունն այլևս սպառվել է։
«Ներքաղաքական ճգնաժամը ձգվում է արդեն երկու ամիս, բավարար է, մենք հոկտեմբերի 25-ը համաժողովրդական վերջնաժամկետի օր ենք հայտարարում», - պնդել է Տիխանովսկայան։
Վերջինիս խոսքով, եթե Լուկաշենկոն այդ պահանջը չկատարի, հոկտեմբերի 25-ից «ողջ երկիրը խաղաղ ցույցի դուրս կգա», իսկ հոկտեմբերի 26-ից երկրում կսկսվի համաժողովրդական գործադուլ։
Լուկաշենկոյի դեմ բողոքի ցույցերը չեն դադարում օգոստոսին տեղի ունեցած վիճահարույց նախագահական ընտրություններից հետո, որոնց արդյունքները չեն ճանաչել Եվրամիությունը, Միացյալ Նահանգներն ու Ուկրաինան:
