Եվրոպայի խորհուրդը ակնկալում է, որ Մարդու իրավունքների եվրոպական դատարանը (ՄԻԵԴ) առաջիկայում որոշում կընդունի Լեռնային Ղարաբաղում իրավիճակի լարվածության վերաբերյալ Հայաստանի հայցի կապակցությամբ: Այս մասին երկուշաբթի օրը ՏԱՍՍ գործակալության թղթակցին հայտնել է Եվրոպայի խորհրդի գլխավոր քարտուղարի ներկայացուցիչ Դանիել Հոլթգենը։
«ՄԻԵԴ-ը ստացել է Հայաստանի հայցը միջանկյալ միջոց կիրառելու հարցով, առայժմ չեմ կարող ասել, թե երբ որոշում կընդունվի այդ հարցով, սակայն ակնկալում եմ, որ դա տեղի կունենա շուտով», - ռուսաստանյան պետական լրատվական գործակալության փոխանցմամբ՝ հայտարարել է Եվրոպայի խորհրդի պաշտոնական ներկայացուցիչը:
Ադրբեջանի նկատմամբ միջանկյալ միջոց կիրառելու պահանջով Հայաստանը Մարդու իրավունքների եվրոպական դատարան է դիմել կիրակի օրը:
«Այն է՝ պարտադրել Ադրբեջանին դադարեցնելու քաղաքացիական օբյեկտների ռմբակոծումը ՀՀ-ի և Արցախի Հանրապետության շփման գծի ողջ երկայնքով, պարտադրել Ադրբեջանին ձեռնպահ մնալ ոչ ընտրանքային հարձակողական գործողություններից, պարտադրել Ադրբեջանին ձեռնպահ մնալ քաղաքացիներին, քաղաքացիական օբյեկտները և բնակավայրերը թիրախավորելուց», - նշված է ՄԻԵԴ-ում ՀՀ ներկայացուցչի տարածած հաղորդագրությունում:
