Սահմանադրական դատարանի (ՍԴ) ձևավորման հետ կապված վերջին զարգացումները Հայ ազգային կոնգրեսը (ՀԱԿ) կքննարկի վարչության նիստում, «Ազատությանը» փոխանցեց ՀԱԿ փոխնախագահ Լևոն Զուրաբյանը:
«ՍԴ ձևավորման հետ կապված վերջին զարգացումների և ավելի լայն՝ հեղափոխական օրակարգի իրականացման հետ կապված լրջագույն խնդիրներ են ի հայտ եկել և ստեղծված իրավիճակը այս շաբաթ կքննարկենք ՀԱԿ վարչության նիստում», - ասաց Զուրաբյանը։
Ազգային ժողովը սեպտեմբերի 15-ին փակ գաղտնի քվեարկությամբ Սահմանադրական դատարանի դատավոր ընտրեց առաջադրված բոլոր երեք թեկնածուներին՝ Դատավորների ընդհանուր ժողովի կողմից առաջադրված Երվանդ Խունդկարյանին, Հայաստանի նախագահի կողմից առաջադրված Արթուր Վաղարշյանին և կառավարության կողմից առաջադրված Էդգար Շաթիրյանին:
