Տոկիոյի քաղաքապետ Յուրիկո Կոիկեն, ով ապագայում, ամենայն հավանությամբ, կհավակնի Ճապոնիայի վարչապետի պաշտոնին, հուսով է, որ կորոնավիրուսի համավարակի պատճառով հետաձգված 2020-ի Ամառային օլիմպիադան անպայման տեղի կունենա հաջորդ տարվա ամռանը։
Հետաձգելու որոշումից հետո թե՛ Միջազգային օլիմպիական կոմիտեն և թե՛ Սինձո Աբեի ղեկավարած Ճապոնիայի կառավարությունը նշել են, որ 2021 թվականն Օլիմպիադայի վերջին տարբերակն է, և եթե համավարակը չզսպվի, ապա միակ լուծումը կլինի 2020 թվականի ամառային խաղերի վերջնական չեղարկումը։
«Տոկիոն ամեն գնով պետք է հյուրընկալի խաղերը, ես ուզում եմ, որ Օլիմպիադան դառնա այս ծանր իրավիճակը համայն մարդկության միասնական ջանքերով հաղթահարելու խորհրդանիշ», - ասել է քաղաքապետ Յուրիկո Կոիկեն։
2020 թվականի Ամառային օլիմպիադան պետք է այս ամիս սկսվեր, սակայն ամբողջ աշխարհով տարածվող կորոնավիրուսի վտանգը ՄՕԿ-ի և Ճապոնիայի ղեկավարներին գարնանը ստիպել է հետաձգել խաղերը, որոշում, որը սոսկ մի քանի անգամ է կայացվել արդիական օլիմպիական շարժման պատմության ընթացքում։
Միջազգային օլիմպիական կոմիտեի նախագահ Թոմաս Բախն այս տարվա մարտի 25-ին ասել է, որ շատ ծանր էր Օլիմպիադանբ հետաձգելու վճիռը։
«Մեր առաքելությունն է կազմակերպել խաղերը, անել ամեն ինչ, որ մարզիկների փայփայած երազանքներն իրականություն դառնան», - ասել է Միջազգային օլիմպիական կոմիտեի նախագահ Թոմաս Բախը, և ավելացրել է, որ այնուամենայնիվ գերագույն արժեքը մարզիկների և հանդիսատեսների առողջությունն է։
Ճապոնական կողմը դեռ մարտ ամսին հույս էր հայտնել, որ խաղերը տեղի կունենան, այդ մասին ասել է 2020 թվականի Օլիմպիադայի կազմկոմիտեի նախագահ, Ճապոնիայի նախկին վարչապետ Յոշիրո Մորին։
Նրա փոխանցմամբ, Ճապոնիայի կառավարությունը բանակցել է ՄՕԿ-ի հետ, երկու կողմերն էլ համաձայնել են, որ խաղերի չեղարկումն ընդունելի տարբերակ չէ։ Մարզիկների և մարզասերների անվտանգությունը թիվ մեկ առաջնահերթությունն է համարվել, իրավիճակն աշխարհում վատթարացել է, հետևաբար, ընդունվել է խաղերը հետաձգելու որոշում։
«Օլիմպիական կրակը կմնա Ճապոնիայում՝ որպես աշխարհի համար հույսի փարոս այս դժվար ժամանակներում», - ասել է 2020 թվականի խաղերի կազմկոմիտեի ղեկավարը։
Մինչդեռ, Տոկիոյի քաղաքապետ Կոիկեի համար հեշտ չի լինի կյանքի կոչել 2021-ին խաղերն անցկացնելու ծրագիրը, քանի որ, ըստ վերջին հարցումների, բնակիչների զգալի մասը ենթադրում է, որ Օլիմպիադան պետք է ևս մեկ անգամ հետաձգել կամ պարզապես չեղյալ հայտարարել։
Առավել մտահոգված են ճապոնացիները հենց այս օրերին, քանի որ երկրում գրանցվել է կորոնավիրուսի նոր բռնկումների անսպասելի աճ։ Ճապոնիայում ընդհանուր հաշվով վարակվել է 21 և կես հազար մարդ, մահացել է 982 հյիվանդ։
«Իրավիճակն աշխարհում տակավին բարդ է, բայց, կարծում եմ, որ մենք պարտավոր ենք հետևողականորեն ձեռնարկել Օլիմպիադան անցկացնելու համար անհրաժեշտ միջոցներ, հետևել կացությանը և վարակի տարածման միտումներին», - ասել է Տոկիոյի քաղաքապետը։