Խաբարովսկի երկրամասի կալանավորված նահանգապետ Սերգեյ Ֆուրգալի տասնյակ հազարավոր վրդովված աջակիցներ քաղաքի կենտրոնում բողոքի ցույց են անցկացնում:
Ֆուրգալը մեղադրվում է 2004-2005 թվականներին Խաբարովսկի և Ամուրի շրջաններում գործարարների սպանություններ կազմակերպելու մեջ: Նա հերքում է մեղադրանքը:
Ցուցարարները հավաքվել են Խաբարովսկի Լենինի հրապարակում, որտեղից երթով շարժվել են դեպի Կոմսոմոլսկայա հրապարակ:
Նրանք պարզել են «Ես Սերգեյ Ֆուրգա՛լն եմ», «Ազատությո՛ւն Ֆուրգալին», «Ամո՛թ Մոսկվային», «Կորչի՛ ցարը» և «Պուտինը գո՛ղ է» գրություններով պաստառներ:
Ֆուրգալին նախնական կալանքի ենթարկելու որոշումը երեկ կայացրել է մոսկովյան դատարանը:
Ռուսաստանի լիբերալ-դեմոկրատական կուսակցության անդամ Ֆուրգալը 2018 թվականին երկրամասի տեղական ընտրություններում հաղթել է գործող նահանգապետ, «Եդինայա Ռոսիա» կուսակցության թեկնածու Վյաչեսլավ Շպրոտին, ինչը համարվել է Ռուսաստանում իշխող քաղաքական ուժի լուրջ ձախողում:
