Չեխիայի առողջապահության նախարարության տվյալներով` երկրում գրանցվել է կորոնավիրուսի 9 հազար 140 դեպք։ Մահացել է 319 մարդ, ապաքինվել է 6 հազար 460 հիվանդ։
Մայիսի 19-ից Չեխիայում բնակիչները կարող են հիմնարկներում չկրել պաշտպանական դիմակներ՝ առնվազն երկու մետր սոցիալական հեռավորություն պահպանելու պայմանով։
Աշակերտները կարող են կամավորության սկզբունքով հաճախել տարրական դպրոցներ։
Հիգիենայի կանոնների խիստ ապահովման պայմանով արտոնվել է սննդի օբյեկտների փակ սրահների, հյուրանոցների, լողավազանների և հանրային նշանակության այլ հիմնարկների աշխատանքը։
Թույլատրվել է անցկացնել մարզական միջոցառումներ, որոնց մասնակիցների և հանդիսականների թիվը չի գերազանցում 300-ը։ Մայիսի 23-ից վերսկսվել են Չեխիայի ֆուտբոլի առաջին լիգայի խաղերը։
Czech Airlines ավիաընկերութկունը վերսկսել է չվերթներն Օդեսա, Բուխարեստ, Կիև, Ֆրանկֆուրտ և Փարիզ։
Մայիսի 26-ից վերաբացվել են Չեխիայի սահմանները Գերմանիայի և Ավստրիայի հետ։
Օտարերկրացի զբոսաշրջիկների մուտքը դեռ արգելված է։ Չեխիա ժամանող մարդիկ պարտավոր են ներկայացնել կորոնավիրուսի ստուգման բացասական պատասխանով տեղեկանք և կարանտինի ենթարկվել։
Մայիսի 27-ից վերաբացվել է Չեխիայի և Սլովակիայի սահմանը, սակայն փոխադարձ այցերը կարող են տևել մինչև 48 ժամ։ Նույն կարգն է գործում նաև Հունգարիա մեկնելու և այդ երկրից Չեխիա ժամանելու համար։
