Երեկ երեկոյան Արցախի Պաշտպանության բանակի զինծառայող է մահացել՝ կրակոցից, դեռևս չպարզված հանգամանքներում:
Արցախի պաշտպանության նախարարության մամուլի ծառայության հաղորդագրության համաձայն՝ 20-ամյա զինծառայող Հենրիկ Սամսոնի Արամյանը մահացու հրազենային վիրավորում է ստացել երեկ ժամը 20:32-ի սահմաններում, ՊԲ արևելյան ուղղությամբ տեղակայված զորամասերից մեկի պահպանության տեղամասում:
Դեպքի մանրամասները պարզելու համար կատարվում է քննություն:
Արցախի ռազմական գերատեսչությունը «կիսում է կորստյան ծանր վիշտը և իր զորակցությունը հայտնում մահացած զինծառայողի ընտանիքի անդամներին, հարազատներին ու ծառայակիցներին», - ասված է հաղորդագրությունում:
Քննչական կոմիտեն հայտնում է, որ պարտադիր ժամկետային զինծառայող, շարքային Հենրիկ Արամյանը հրազենային վիրավորումն ստացել է գլխի շրջանում:
Նույն աղբյուրի փոխանցմամբ, քրեական գործ է հարուցվել Քրեական օրենսգրքի 104-րդ հոդվածի առաջին մասով նախատեսված հանցագործության՝ սպանության հատկանիշներով:
