«Նորք» ինֆեկցիոն հիվանդանոցի պացիենտներից «այս պահին մենք ռենտգենով հաստատված 11 թոքաբորբի դեպք ունենք, որոնցից, սակայն, ընդամենը 3-ին է անհրաժեշտ ավելի ինտենսիվ թերապիա, և նրանք գտնվում են ինտենսիվ թերապիայի բաժանմունքում», - հայտարարեց Առողջապահության նախարար Արսեն Թորոսյանը՝ գիշերը ֆեյսբուքյան ուղիղ հեռարձակմամբ ներկայացնելով Հայաստանում կորոնավիրուսի վարակի հետ կապված իրավիճակը:
«Սակայն կրկին՝ որևէ մեկի կյանքին, բարեբախտաբար, վտանգ չի սպառնում, ռեանիմատոլոգները շարունակում են հսկողություն իրականացնել 24-ժամյա ռեժիմով ինտենսիվ թերապիայի պացիենտների նկատմամբ, իսկ մյուս բժիշկները արդեն սովորական պացիենտների՝ որևէ ծանր խնդիր չունեցող պացիենտների նկատմամբ», - ասաց նախարարը:
Թորոսյանը հայտնեց՝ «քանի որ հաստատված դեպքերի աճ ունենք, Նորքի ինֆեկցիոն հիվանդանոցը միակ տեղը չի այլևս, որտեղ որ մեր քաղաքացիները բուժում են ստանում կամ գտնվում են, եթե բուժման կարիք չկա»: «Մենք ունենք արդեն ծավալված շուրջ 5 բուժհաստատություն, ևս 2-ում մարզային կան հատուկենտ թվով, ավելի քիչ թվով պացիենտներ», - փոխանցեց նախարարը՝ հավելելով. - «Այլ հիվանդանոցներ գնում են գրեթե ասիմպտոմ դեպքերը, պացիենտները, երբ որ որևէ սիմպտոմ չունեն, իսկ այն քաղաքացիները, որոնք ունեն թեթև սիմպտոմներ, շարունակում են մնալ Նորքի ինֆեկցիոն հիվանդանոցում»:
Ավելի վաղ Առողջապահության նախարարության խոսնակն «Ազատությանը» հայտնել էր, որ վարակակիրներից 4-ի մոտ թոքաբորբ կա, ոչ ոքի կյանքին վտանգ չի սպառնում:
Հիշեցնենք, այսօր առավոտյան հրապարակված տվյալներով՝ Հայաստանում արձանագրված է կորոնավիրուսի հիվանդության 136 դեպք, մեկ մարդ ապաքինվել է:
Կորոնավիրուսի վարակի հետ կապված՝ մարտի 16-ից Հայաստանում մեկ ամսով հայտարարվել է արտակարգ դրություն։
Մանրամասները տե՛ս այստեղ
