Լոռու մարզպետարանում ստեղծված կորոնավիրուսի ներթափանցման և տարածման դեմ պայքարի հանձնաժողովն այսօր կանցկացնի իր առաջին փակ նիստը։ Մարզպետարանի պաշտոնական հաղորդագրության համաձայն` մարզպետի գլխավորությամբ գործող հանձնաժողովն «անհրաժեշտ գործողություններ կիրականացնի շուրջօրյա ռեժիմով»:
Վանաձորի համայնքապետարանի ենթակայությամբ աշխատող բոլոր հիմնարկները փակ են։ Աշխատում է միայն քաղաքապետարանը, ընդ որում համայնքապետ Մամիկոն Ասլանյանը թույլատրել է անչափահաս երեխա ունեցող մայրերին չգալ աշխատանքի։
Նա «Ազատությանն» ասաց, որ դա իրենց աշխատողների մոտ 30 տոկոսն է. - «Մեր աշխատակիցներից հորդորներ եղան, որ մենք էստեղ աշխատում ենք, երեխեքը՝ տանը, խնամքի կարիք կա։ Որոշեցինք, մայրերին ասացինք՝ ցանկության դեպքում կարող են աշխատանքի չգալ», - ասաց Մամիկոն Ասլանյանը։
Վանաձորում չեղարկվել են քաղաքապետարանի և մարզպետարանի կողմից կազմակերպված բոլոր մարզական ու մշակութային միջոցառումները։ Վանաձորի համայնքապետն «Ազատությանը» փոխանցեց նաև, որ արդեն երկու օր է` յուրաքանչյուր երթուղուց հետո ախտահանվում են հասարակական տրանսպորտային միջոցները։
Լոռու մարզպետ Անդրեյ Ղուկասյանն «Ազատությանը» հայտնեց, որ մարզում մի քանի տասնյակ անձինք, որոնք վերադարձել են այլ երկրներից, մասնավորապես Իրանից և Իտալիայից, կամ նրանց հետ շփվածներն ինքնամեկուսացված են և գտնվում են անընդհատ հսկողության տակ։
Մինչդեռ Հայաստանի ամենաշատ թվով՝ մոտ 2000 աշխատակից ունեցող Վանաձորի «Գլորիա» ֆաբրիկան աշխատանքը կդադարեցնի միայն Հայաստանում արտակարգ դրություն սահմանելու դեպքում։ Հիմնադիր-ղեկավար Բագրատ Դարբինյանը «Ազատությանն» ասաց` կառավարության որոշման են սպասում, աշխատանքը չեն դադարեցնի, քանի դեռ կորոնավիրուսով վարակվածության որևէ դեպք չի եղել իրենց մոտ։
«Եթե մեր մոտ մասսայական, անգամ 5-10 դեպք չլինի, վատ զգան, մենք մտադիր չենք փակելու, որովհետև հանաք բան չի միանգամից կանգնեցնելը։ Ինչո՞ւ կանգնեցնենք, եթե հիվանդներ չկան, պատվիրատուները չեն հրաժարվում», - նշեց Բագրատ Դարբինյանը։ Նշենք, որ ֆաբրիկայի պատվիրատուները իտալական ընկերություններ են։
Մարտի 13-ին կորոնավիրուսի կասկածով Վանաձորի ինֆեկցիոն հիվանդանոց տեղափոխված 5 անձանցից մեկը «Գլորիա» ֆաբրիկա այցելած իտալացի մասնագետն էր։ Թեստի համաձայն բոլոր 5 անձանց մոտ կորոնավիրուս չէր հայտնաբերվել։ Երեկ Վանաձորում արված ևս 5 անձանց թեստերը նույնպես բացասական են եղել։
Հարցին, թե արդյո՞ք կանխարգելիչ որևէ միջոցառում իրականացնում են, թե՞ ոչ, Դարբինյանը պատասխանեց, որ ընդամենն աշխատողներին հորդորում են աշխատավայրում հաճախակի լվացվել. - «Ես չգիտեմ` էլ ինչ կարելի է անել։ Չգիտեմ` ախտահանիչ ինչ միջոցներ պետք է օգտագործել։ Հիմա եթե դիմակ պետք է դնեն, դիմակ որտեղի՞ց ճարեմ։ Դա ես չէ, որ պետք է անեմ, այլ համապատասխան կառույցները երևի», - ասաց նա։
Նշենք, որ այսօր` ժամը 15:00-ին, կառավարությունն արտահերթ նիստում կքննարկի արտակարգ դրություն մտցնելու հարցը: Հայաստանում հաստատվել է կորոնավիրուսի 30 դեպք, որից 3-ը` երևանյան ձեռնարկություններից մեկում:
