Կորոնավիրուսով վարակվածների թիվն Իրանում ավելացել է ևս 835-ով, մահվան դեպքերինը՝ 11-ով։ Այդ մասին այսօր ասուլիսի ժամանակ հայտնել է երկրի առողջապահության նախարարի տեղակալը։
IRNA լրատվական գործակալության փոխանցմամբ՝ Ալիռեզա Ռաիսին հաղորդել է, որ վարակվածների ընդհանուր թիվը երկրում հասել է 2 հազար 336-ի, որից բուժվել է 435 մարդ,, մահացել՝ 77-ը։
Ռաիսին մանրամասնել է, որ սկզբնական փուլերում կորոնավիրուսի կասկածով 8 հազար 532 մարդ տեղափոխվել է հիվանդանոց, նրանցից թեստավորվել են 5 հազար 737-ը, վարակը հայտնաբերվել է 2 հազար 336-ի մոտ։
Փոխնախարարը նշել է նաև, որ ամենաշատը վարակը տարածված է Գիլանում, Ղոմում և մայրաքաղաք Թեհրանում։
Հայաստանի վարչապետը երեկ տեղեկացրեց, որ Կառավարության միջգերատեսչական հանձնաժողովը որոշում է կայացրել երկարացնել և խստացնել հայ-իրանական սահմանի շուրջ գործող սահմանափակումները, այդ թվում՝ բեռնափոխադրումների մասով։ Ըստ Նիկոլ Փաշինյանի, 5 օրվա ընթացքում Հայաստանը ժամանակավորապես կվերականգնի նաև Իրանի հետ վիզային ռեժիմը։
Կորոնավիրուսի վարակի Հայաստանում արձանագրված միակ դեպքը, հիշեցնենք, հայտնաբերվել է Իրանից ժամանած ՀՀ քաղաքացու մոտ։
