Պաղեստինի առաջնորդ Մահմուդ Աբբասն ասել է, որ խզում է բոլոր կապերն Իսրայելի և Միացյալ Նահանգների հետ՝ այդ թվում անվտանգության հարցերում:
Պաղեստինն այդ որոշումն ընդունել է Մերձավոր Արևելքում խաղաղություն հաստատելու Վաշինգտոնի անցած շաբաթ հրապարակած ծրագրի կապակցությամբ:
Աբբասն այդ մասին հայտարարել է այսօր Կահիրեում, նշելով, որ Դոնալդ Թրամփի ծրագիրը «հակասում է իսրայելցիների և պաղեստինցիների համաձայնությանը, որը կնքվել է 1993 թվականին Օսլոյում»:
«Ես երբեք չեմ ընդունի այդ գործարքը, ես երբեք չեմ համաձայնի պատմության մատյանում գրանցվել որպես Երուսաղեմը ծախող առաջնորդ», - ասել է Մահմուդ Աբբասը:
Հունվարի 28-ին հրապարակված ամերիկյան ծրագրով, որը Թրամփն անվանել է «դարի գործարք», Իսրայելը պետք է օրինականացնի Հորդանանի հովտի և Արևմտյան ափի շրջանում գրաված բոլոր բնակավայրերը, որոնց մեծ մասը միջազգային համայնքը համարում է Իսրայելի կողմից ապօրինի զավթված տարածքներ:
Այդ հնարավորության դիմաց պաղեստինցիներին կտրամադրվի Գազայի հատվածում, Արևմտյան ափի որոշ շրջանների, ինչպես նաև Երուսաղեմի հեռավոր որոշ արվարձանների նկատմամբ «սահմանափակ ինքնիշխանություն»:
Այդ ծրագրով միջազգային սահմանների և օդային տարածքի հսկողությունը վերապահվում է Իսրայելին:
Ծրագրով ենթադրվում է 1948 թվականի պատերազմից հետո շրջանից հեռացած պաղեստինցիների և նրանց ժառանգների վերադարձի արգելք, թեպետ վերադարձի հնարավորությունը Պաղեստինը համարում է առանցքային պահանջներից մեկը:
Արաբական լիգայի երկրները Պաղեստինի խնդրանքով են Կահիրեում համաժողով գումարել:
Եգիպտոսը Պաղեստինին և Իսրայելին հորդորում է «մանրամասն վերլուծել ամերիկացիների առաջարկը և վերականգնել գրավյալ տարածքներում անկախ և ինքնիշխան պետություն կայացնելու պաղեստինցիների օրինական իրավունքը»:
Հորդանանը դատապարտել է Իսրայելին Պաղեստինի տարածքների գրավման կապակցությամբ և հայտնել է, որ պաշտպանում է 1967 թվականի սահմաններում անկախ Պաղեստինի պետություն ստեղծելու գաղափարը:
1967 թվականի դրությամբ Հորդանանի արևմտյան ափը և Երուսաղեմի արևելյան հատվածը համարվել են պաղեստինյան տարածք:
