Էկվադորում գրեթե մեկ շաբաթ շարունակվող զանգվածային ցույցերի պատճառով երկրի կառավարությունը մայրաքաղաք Կիտոյից տեղափոխվել է այլ քաղաք: Ցուցարարները շրջափակել են կառավարական շենքերն ու խորհրդարանը: Շրջափակումները վերացնելու նպատակով Էկվադորի նախագահ Լենին Մորենոն կառավարական շենքերին հարող շրջաններում պարետային ժամ է սահմանել: Ուժայինները ցուցարարների դեմ արցունքաբեր գազ են կիրառել:
Զանգվածային ցույցերի պատճառը վառելիքի գների կրկնակի թանկացումն է, որը տեղի ունեցավ, երբ կառավարությունը որոշեց դադարեցնել վառելիքի շուկայի սուբսիդավորումը: Մորենոն հայտարարել է, որ այդ քայլը անհրաժեշտ է՝ զսպելու համար ֆինանսական ահռելի դիֆիցիտը, որն առաջացել է նախկին իշխանությունների վարած ձախակողմյան քաղաքականության պատճառով:
Էկվադորը Արժույթի միջազգային հիմնադրամից բազմամիլիարդանոց վարկեր է վերցրել, ու հիմա կառավարությունը կրճատում է պետական ծախսերն ու սուբսիդավորումները:
Ցուցարարները պահանջում են նախագահի հրաժարականը: Մորենոն ընտրվել է 2,5 տարի առաջ: Երեկ երեկոյան նա հայտարարել է, որ ոչ մի դեպքում հրաժարական չի տա, քանի որ երկրի զարգացման համար ճիշտ որոշում է կայացվել:
Կառավարությունն ասել է, թե բաց է ՄԱԿ-ի կամ Կաթոլիկ եկեղեցու միջնորդությամբ բանակցությունների համար՝ հարթելու իրավիճակը:
Զանգվածային բողոքի ակցիաները Լենին Մորենոն համարել է հեղաշրջման փորձ, որն, ըստ նրա, հրահրում են Էկվադորի նախկին նախագահը, ինչպես նաև Վենեսուելայի նախագահ Նիկոլաս Մադուրոն: Նրա մեղադրանքները երկուսն էլ հերքում են:
