Միացյալ Նահանգները հավելյալ բանակային ստորաբաժանումներ կուղարկի Սաուդյան Արաբիա` այդ երկրի հակաօդային պաշտպանության համակարգը ուժեղացնելու նպատակով: Այդ մասին անցած գիշեր Վաշինգտոնում կայացած մամուլի ասուլիսի ժամանակ հայտարարել է Միացյալ Նահանգների պաշտպանության նախարարի պաշտոնակատար Մարկ Էսպերը:
«Արձագանքելով թագավորության խնդրանքին` նախագահը հավանություն է տվել [Սաուդյան Արաբիայում] ամերիկյան հավելյալ զորքերի տեղակայման որոշմանը: Այդ ստորաբաժանումները իրենց բնույթով պաշտպանական են լինելու և հիմնականում կենտրոնանալու են հակաօդային և հակահրթիռային պաշտպանության խնդիրների վրա: Մենք նաև աշխատում ենք Սաուդյան Արաբիա և Արաբական Միացյալ Էմիրություններ ամերիկյան ռազմական սարքավորումների առաքումներն արագացնելու ուղղությամբ: Այդ մատակարարումները կմեծացնեն երկու երկրների ինքնապաշտպանական կարողությունները», - հայտարարում էր Պենտագոնի ղեկավարը:
Սաուդյան Արաբիայի ղեկավարությունը Մերձավոր Արևելք ամերիկյան նոր ստորաբաժանումներ ուղարկելու խնդրանքով դիմել էր երկրի խոշորագույն նավթային ձեռնարկությունների դեմ սեպտեմբերի 14-ին իրականացված հարձակումներից հետո:
