Երևանի ընդհանուր իրավասության դատարանը այսօր կրկին հեռացավ խորհրդակցական սենյակ՝ որոշում կայացնելու Մարտի 1-ի գործով առանցքային մեղադրյալ Ռոբերտ Քոչարյանին գրավով ազատ արձակելու կամ նրա նկատմամբ անազատության հետ չկապված խափանման միջոց կիրառելու՝ Հայաստանի երկրորդ նախագահի պաշտպանների միջնորդությունների վերաբերյալ:
Դատավոր Աննա Դանիբեկյանը հայտարարեց, որ որոշումը կհրապարակվի սեպտեմբերի 20-ին, ժամը 17-ին:
Այսօր ավելի վաղ դատարանը հրապարակեց իր որոշումը նախկին նախագահի խափանման միջոց կալանքը անհապաղ վերացնելու՝ Քոչարյանի պաշտպանների միջնորդությունը մերժելու մասին:
Հայաստանի երկրորդ նախագահը մեղադրվում է սահմանադրական կարգը տապալելու և առանձնապես խոշոր չափերով՝ 3 միլիոն դոլար կաշառք ստանալու մեջ:
Ռոբերտ Քոչարյանը կալանքի տակ է հունիսի 25-ից:
