Ըստ նախկին զինդատախազ, գլխավոր դատախազի նախկին տեղակալ, իրավագետ Գագիկ Ջհանգիրյանի, Սահմանադրական դատարանում (ՍԴ) այսօր իսկապես խնդիր կա, ինչպես հայտարարում է Սահմանադրական դատարանի դատավոր Վահե Գրիգորյանը։
«Խնդիրը կա։ Ցավոք, մեր իրավաբանների զգալի մասը նաև ասում է՝ ճգնաժամ չի։ Ես չգիտեմ՝ չգնաժամը պոզով-պոչով է լինում, ինչով է լինում, բայց Սահմանադրական դատարանն այսօր ունի 7 անդամ և երկու դատավոր, որոշումներ կայացնելու լիազորություններ ունեն միայն դատավորները։ Հիմա ոնց ուզում եք անվանեք՝ ուզում եք խնդիր անվանեք, ճգնաժամ անվանեք, խոց անվանեք, բայց փաստը մնում է փաստ, որ էդ վիճակը կա», - «Ազատության» «Կիրակնօրյա վերլուծական Հրայր Թամրազյանի հետ» հաղորդման ժամանակ ասաց Ջհանգիրյանը։
Հարցին, թե Դատավորների ժողովն իրավունք ունի՞ պահանջելու ունենալ երեք դատավոր, Ջհանգիրյանը պատասխանեց. - «Պահանջելու կարիք չկա, որևէ մեկից չպետք է պահանջեն, նրանց էդ իրավունքը տալիս է Սահմանադրությունը։ Ես կարծում եմ, որ նրանց հավաքվելիք ժողովում էդ հարցը կքննարկվի և թեկնածուներ կառաջադրեն։ Որևէ մեկից չպետք է պահանջել էդ իրավունքը, էդ իրավունքը նրանց տալիս է մեր Սահմանադրությունը, լավ է, վատ է, քոռ է, քաչալ է, տալիս է, պետք է դրանով էլ ղեկավարվել»։
Ջհանգիրյանն ընդգծեց՝ ՍԴ ներկայիս անդամները չեն կարող դատավորի գործառույթ իրականացնել, որովհետև Սահմանադրությամբ և օրենքներով սահմանված կարգով դատավոր չեն ընտրվել։
«Գուցե իմաստ ունի Սահմանադրական դատարանի մասին օրենքում լրացում կատարել, նշել էն գործառույթները, որոնցով պետք է զբաղվեն Սահմանադրական դատարանի էս անդամները, որոնք հրաժարական չեն տալիս մինչև թոշակի իրենց տարիքը հասնելը, բայց նրանք չեն կարող դատավորի գործառույթ իրականացնել, որովհետև Սահմանադրությամբ և օրենքներով սահմանված կարգով դատավոր չեն ընտրվել», - ասաց նախկին զինդատախազը։
Վահե Գրիգորյանը հունիսի 20-ին Ազգային ժողովում երդվելիս հայտարարեց ՍԴ-ում ճգնաժամի մասին, որը պայմանավորված է Սահմանադրական դատարանի գործող կազմով։
Որոշումները, ըստ Սահմանադրության, ընդունում են դատավորները՝ որոշ դեպքերում հինգ, որոշ դեպքերում՝ վեց դատավորի քվեով: Մինչդեռ 9 հոգանոց ՍԴ-ի կազմից 7-ը անդամի կարգավիճակ ունեն, ուստիև որոշում կայացնելու լիազորություն չունեն։
Վահե Գրիգորյանը նամակով դիմեց Սահմանադրական դատարանի անդամներին, Ազգային ժողովին, Հայաստանի նախագահին, Կառավարությանը, Դատավորների ընդհանուր ժողովին և ելքեր առաջարկեց․ համատեղ որոշմամբ պահպանվում է ներկա իրավիճակը, կամ 7 թափուր հաստիքների համար նախագահը, Դատավորների ընդհանուր ժողովն ու Կառավարությունը Ազգային ժողով թեկնածուներ են ներկայացնում: Իսկ երրորդ տարբերակում Գրիգորյանն ակնարկեց Սահմանադրական դատարանի դատավորների հրաժարականի մասին՝ առաջարկելով, որ այդ դեպքում վաղ կենսաթոշակային սխեմա գործի։
Հաղորդումն ամբողջությամբ կարող եք դիտել այստեղ.
