«Սասնա ծռեր» համահայկական կուսակցության հայտարարության մեջ ասվում է, որ նախանշված նպատակները զգալի չափով համընկնում են իրենց օրակարգին, ուստի ողջունելի են: Կուսակցությունում սակայն կարծում են գործընթացը նախ հարկավոր է սկսել նախորդ ռեժիմի գործունեության իրավաքաղաքական գնահատականից:
Կուսակցության անդամ Արթուր Մովսիսյանը «Ազատության» հետ զրույցում ասաց․ - «Սա ուշացած քայլ էր, բայց անհրաժեշտ քայլ էր: Փաշինյանը էս իրա կոչով, ուղերձով որևէ սահմանադրական կետ չի խախտում: Փաշինյանը խնդրել ա ժողովրդի աջակցությունը, իսկ բոլորս գիտենք, որ իշխանությունը պատկանում ա ժողովրդին, և ժողովուրդը կենդանի սահմանադրություն ա»:
Հարցին, թե ինչ դերակատարություն ունեցավ Ռոբերտ Քոչարյանի նկատմամբ ընտրված խափանման միջոցը փոխելու երաշխավորությունը, որ ներկայացրել էին Արցախի գործող և երկրորդ նախագահը, Մովսիսյանը պատասխանեց․ - «Գոյություն ունի Արցախ, գոյություն ունի Հայաստան և գոյություն ունի ղարաբաղյան կլան․ էս երեքը չի կարելի խառնել»:
«Քաղաքացու որոշում» արտախորհրդարանական ընդդիմադիր կուսակցությունում ողջունում են դատական համակարգը առողջացնելու գործադիր և օրենսդիր մարմինների քաղաքական կամքը և պատրաստ են այդ օրակարգը կյանքի կոչելու համար բոլոր շահագրգիռ կողմերի հետ մեկտեղել ջանքերը:
Կուսացության անդամ Միքայել Նահապետյանը «Ազատության» հետ զրույցում վերահաստատեց՝ ՀՀ-ում դատաիրավական խորքային բարեփոխման կարիք ունի․ - «Քաղաքական կամքը էդպիսի բարեփոխումներ իրականցնելու համարում ենք դրական: Առավել մանրամասների՝ մեխանիզմների և միջոցների հետ կապված պատրաստ ենք մեկտեղել մեր ջանքերը, որովհետև մենք նույնպես այդ ոլորտում բավական լուրջ փորձագիտական ռեսուրս ունենք»:
Անդրադառնալով այսօր առավոտյան դատարանների մուտքը արգելափակելում՝ Նահապետյանն ասաց․ - «Վարչապետի մեկնաբանությունից կարելի էր ենթադրել, որ դա սիմվոլիկ ակցիա էր: Ընդհանուր առմամբ մենք ունենք մեր պատկերացումները քաղաքացիական անհնազանդության նպատակի, նշանակության հետ կապված, և կարող եմ արձանագրել, որ առավոտյան տեղի ունեցած գործողությունները մեր պատկերացումների շրջանակից դուրս էին այն առումով, որ վարչապետը և նրա գլխավորած քաղաքական թիմը առանց այդ էլ տիրապետում են իրավական բոլոր մեխանիզմներին ռեֆորմներ անելու համար, ուստի անհնազանդության գործիքները այդ առումով հույժ անհրաժեշտություն չեն»:
Հայաստանի հանրապետական կուսակցությունը դատապարտում է աննախադեպ ճնշումը դատական համակարգի վրա, իսկ ՀՅԴ-ն վարչապետի կոչը համարում է «Հայաստանում սահմանադրական կարգի դեմ կատարված քայլ»: Այս մասին վերջիններս հայտարարել էին երեկ վարչապետի ֆեյսբուքյան հեռարձրակումից հետո:
Դաշնակցութունը հայտարարել է նաև, որ մայիսի 23-ին ժամը 19-ին Ազատության հրապարակում հրավիրում է հանրահավաք։
