Անընդունելի համարելով դատարանների բնականոն գործունեության խաթարումը՝ Բարձրագույն դատական խորհուրդը (ԲԴԽ) հանդես է եկել հայտարարությամբ՝ կոչ անելով դատավորներին և դատական իշխանության բոլոր աշխատակիցներին դրսևորել ծայրահեղ զսպվածություն, բացառապես մնալ իրավական դաշտում:
ԲԴԽ-ն տեղեկացնում է, որ այսօր երեկոյան արտահերթ նիստ է հրավիրել, որում քննարկվել է դատարանների շուրջ ստեղծված իրավիճակը:
«Խորհուրդն արձանագրել է, որ նախապես ՀՀ վարչապետի մոտ մայիսի 20-ին ժամը 12.00-ին նշանակված է եղել խորհրդակցություն՝ նվիրված դատաիրավական բարեփոխումների հիմնախնդիրներին: Հաշվի առնելով, որ վերահաստատվել է նշված խորհրդակցության անցկացումը և դրան նաև Բարձրագույն դատական խորհրդի նախագահի մասնակցությունը, Խորհուրդը հանգեց այն հետևությանը, որ ստեղծված իրավիճակի առնչությամբ ամբողջական դիրքորոշում արտահայտել խորհրդակցությունից հետո հրավիրվող նիստում, անընդունելի համարելով դատարանների բնականոն գործունեության խաթարումը, Խորհուրդը միաժամանակ կոչ է անում դատավորներին և դատական իշխանության բոլոր աշխատակիցներին դրսևորել ծայրահեղ զսպվածություն, բացառապես մնալ իրավական դաշտում», - ասված է հաղորդագրությունում:
Վարչապետն այսօր կոչ է արել վաղն առավոտյան արգելափակել դատարանների մուտքերը։
