Ադրբեջանցի հետաքննող լրագրող, նախագահ Ալիևի ընտանիքի կոռուպցիոն գործարքների մասին աղմկահարույց հրապարակումներով հայտնի Խադիջա Իսմայիլովան այսօր Եվրոպական դատարանում երկրորդ հաղթանակն է տարել Ադրբեջանի կառավարության դեմ:
Ստրասբուրգյան դատարանը արձանագրել է, որ ադրբեջանցի իրավապահները արդյունավետ հետաքննություն չեն իրականացրել լրագրողի անձնական կյանքի նկատմամբ կատարված ոտնձգության գործով: Դատարանը պարտավորեցրել է Ադրբեջանի իշխանություններին 15 հազար եվրո փոխհատուցում վճարել լրագրողին՝ անձնական կյանքի իրավունքը ոտնահարելու և խոսքի ազատությունը ճնշելու համար:
2012 թվականին, երբ Իսմայիլովան սկսել էր հոդվածներ հրապարակել Ադրբեջանում տարածված կոռուպցիայի և պաշտոնյաների կարողությունների մասին, անհայտ անձինք անանուն նամակով սպառնացել էին նրան վարկաբեկող նյութեր տարածել, եթե հետաքննությունը չավարտի: Լրագրողը մերժել էր դիմումը, ինչից հետո համացանցում հրապարակվել էին Իսմայիլովայի ննջասենյակում կատարված լուսանկարներ ու տեսանյութեր:
